НАТО ядро қуролидан фойдаланишни синовдан ўтказиш учун машғулотларни бошлайди

Бугун, 14 октябрь куни НАТОнинг альянсга аъзо мамлакатларни ҳимоя қилиш бўйича икки ҳафталик йиллик манёврлари бошланади, улар давомида ядро қуролидан фойдаланиш амалиёти ўтказилади. Бу ҳақда НАТОнинг Брюсселдаги штаб-квартираси маълум қилди.

Steadfast Noon машғулотларида Европанинг саккизта ҳаво базасида жойлашган 2000 га яқин аскар иштирок этади. Ҳаво манёврларида 60 дан ортиқ самолётлар, жумладан, АҚШнинг Европада жойлашган ядро бомбаларини олиб юришга қодир замонавий қирувчи самолётлар, узоқ масофали бомбардимончи самолётлар, шунингдек, кузатув ва ёнилғи қуйиш самолётлари иштирок этади.

Жорий йилда манёврлар Бельгия ва Нидерландиядаги ҳаво базаларида, шунингдек, Шимолий денгиз узра – Буюк Британия ва Дания ҳаво кенгликларида бўлиб ўтади. Ҳарбий машғулотларда НАТОга аъзо 13 давлат самолётлари қатнашмоқда.

НАТОнинг таъкидлашича, Steadfast Noon Россиянинг Украинага қарши босқинчилик урушига тўғридан-тўғри муносабат эмас ва манёврлар давомида ҳарбий қурол ишлатилмайди. Шунга қарамай, машғулотлар Москвага альянс ўзини ҳимоя қилишга, шу жумладан ядровий қурол ёрдамида, "агар энг ёмони содир бўлса", ўзини ҳимоя қилишга тайёр эканлиги ҳақида аниқ сигнал бериш учун мўлжалланган.

"Ядровий тўсиқ Шимолий Атлантика альянси хавфсизлигининг асосидир", деди НАТО Бош котиби Марк Рютте манёврлар бошланишидан олдин.

Унинг сўзларига кўра, бу ҳарбий машғулотлар “ҳар қандай душманга” альянс ҳар қандай таҳдидларга жавоб беришга тайёрлигини ва барча иттифоқчиларини ҳимоя қилишини намойиш қилиши керак.

DPA агентлиги маълумотларига кўра, НАТО машғулотлар сценарийси ва тафсилотлари ҳақида ҳеч қандай маълумот бермаган. Бироқ, қатор ҳарбий экспертларнинг фикрича, анъанавий тарзда октябрь ойи ўрталарида бошланган йиллик манёврлар бу сафар Америка ядро қуролини ерости омборларидан самолётларга хавфсиз ташиш ва уларни қирувчи самолётлар остига ўрнатиш амалиётини ўз ичига олади.

“Бироқ кейин ўқув парвозлари бомбаларсиз амалга оширилади”, дейди экспертлар.

Ядро қуролидан биргаликда фойдаланиш бўйича НАТО дастури фавқулодда вазиятларда Европада жойлаштирилган Америка қуролларининг ушбу тури ҳамкор мамлакатлар самолётларидан душман нишонларига қарши ишлатилишини назарда тутади.

Тасдиқланмаган маълумотларга кўра, у Италия шимолида, Туркия, Бельгия, Нидерландияда, шунингдек, Германиянинг Рейнланд-Пфальц федерал штатидаги Бюхель базасида сақланади.

Эслатиб ўтамиз, 25 сентябрь куни Россия Хавфсизлик Кенгаши йиғилишида Путин ядро қуролидан фойдаланиш тамойилларини ўзгартиришни ва ядровий тўсиқ соҳасидаги давлат сиёсати асосларини янгилашни таклиф қилганди. Кремль матбуот котиби Дмитрий Песков Россиянинг ядровий доктринасидаги ўзгариш дўстона бўлмаган мамлакатларга Россия Федерациясига эҳтимолий ҳужум оқибатлари ҳақида огоҳлантириш эканини айтди. Европа Иттифоқи эса Путиннинг ядровий доктринани ўзгартириш ҳақидаги баёнотини “ўта масъулиятсиз ва қабул қилиб бўлмайдиган хатти-ҳаракатларининг давоми” деб атади.