“Насаф” ўз майдонида “Ал-Ҳилол”га имкониятни бой берди

Бугун, 29 сентябрь куни Элит Осиё чемпионлар лигаси 2-тури доирасидаги “Насаф” – “Ал-Ҳилол” баҳси бўлиб ўтди. Қаршининг “Марказий” стадионида бўлиб ўтган мазкур тўқнашувда меҳмонлар 2:3 ҳисобида ғалаба қозонди.

Дастлаб, 21-дақиқада Сергей Милинкович-Савич беллашувдаги ҳисобни очди. Орадан 6 дақиқа ўтиб эса “аждарлар” ярим ҳимоячиси Сардорбек Баҳромов рақиб дарвозасини олис масофадан ишғол этган ҳолда орадаги фарқни йўққа чиқарди. Ўйиннинг биринчи бўлимига қўшиб берилган 45+2-дақиқадаги Тео Эрнандеснинг голи эса “Ал-Ҳилол”нинг танаффусга устунлик билан йўл олишини таъминлади.

Баҳснинг иккинчи бўлими стартида захирадан майдонга тушган Жавоҳир Сиддиқов 61-дақиқада Умар Эшмуродовнинг супер узатмасини голга айлантирди. Меҳмонларга ғалаба келтирган гол эса 79-дақиқада “Ал-Ҳилол”нинг бразилиялик ҳужумчиси Маркос Леонардо томонидан киритилди.

Шу тариқа, “Ал-Ҳилол” мусобақа доирасидаги навбатдаги 3 очкони қўлга киритди ва Шарқий минтақада турнир жадвали етакчисига айланди. “Насаф” эса икки мағлубият билан жадвалда сўнгги ўринни эгаллаб турибди.

Жаҳонгир Иномжонов