Наманганда 3 кишининг ўлимига сабабчи бўлган 19 ёшли ҳайдовчи қамалди

Наманган вилоятининг Уйчи туманида маст ҳолда машина бошқариб, уч кишининг ўлимига сабабчи бўлган 19 ёшли йигит 6 йилга озодликдан маҳрум қилинди. Бу ҳақда “Менинг юртим” хабар берди.

Қайд этилишича, ушбу йўл-транспорт ҳодисаси 2024 йилнинг 29 октябрь куни рўй берган. Судланувчи йигит дўстлари билан тунги клубда спиртли ичимлик истеъмол қилган. Сўнгра ўзига тегишли бўлмаган Captiva машинасини ҳайдовчилик гувоҳномаси йўқлигига қарамай, “Учқўрғон-Уйчи-Наманган” йўлида соатига 100 километр тезликда бошқарган. Оқибатда Cobalt ичида бўлган уч нафар шахс воқеа жойида вафот этган.

north_east

Ўзбекистонда бир йилда 2 мингдан ортиқ одам ЙТҲ оқибатида ҳалок бўлган (видео)

Ҳолат юзасидан Жиноят ишлари бўйича Уйчи туман судида бўлиб ўтган суд мажлисида йигит Жиноят кодексининг 266-моддаси 3-қисми “а” банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан айбдор деб топилди ва 6 йилга озодликдан маҳрум қилинди. Шунингдек, унга 3 йил муддатга барча турдаги транспорт воситасини бошқариш тақиқланди. Жазони манзил-колонияда ўтаттириш белгиланди.

Эслатиб ўтамиз, аввалроқ Тошкент шаҳрининг Мирзо Улуғбек тумани Буюк Ипак йўли кўчасида жорий йилнинг 21 январь куни 3 та автомобиль иштирокида йўл-транспорт ҳодисаси содир бўлиб, оқибатда бир пиёда ҳалок бўлганди.