Наманганда ҳам инспектор пора билан қўлга тушди (видео)

Наманган вилоятининг Чуст туманида инспектор чегарадан чорва молларини ноқонуний ўтказиб бериш эвазига пора олди. Бу ҳақда Давлат хавфсизлик хизмати хабар берди.

Маълум қилинишича, Чуст тумани ИИБ профилактика инспектори 1994 йилда туғилган фуқарога нисбатан келиб тушган аризани кўрмасдан қолдирганлигини рўкач қилиб, ундан 2 минг АҚШ доллари талаб қилган ва жорий йилнинг февраль ойида 700 АҚШ доллари олган.

Инспектор ўзининг ноқонуний ҳаракатини давом эттириб, фуқародан қолган 1300 долларни ҳамда келгусида унга “ўзбек-қирғиз” давлат чегараси орқали чорва молларини ноқонуний олиб ўтишида раҳнамолик қилиш эвазига 2000 доллар, жами 3300 АҚШ доллари сўраган.

Давлат хавфсизлик хизмати, Бош прокуратура ҳузуридаги Департамент ва ИИВ Шахсий хавфсизлик бош бошқармаси ходимлари ҳамкорлигида ўтказилган тезкор тадбирда у мазкур пул маблағини олган вақтида ушланган.

Ҳозирда профилактика инспекторига нисбатан Жиноят кодексининг 165-моддаси (товламачилик) ва 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Самарқанд шаҳар ИИО ФМБ профилактика инспектори 7 минг доллар пора олган вақтида қўлга тушганди.