Нью-Йоркдаги турнирда баскетболчи отиб ўлдирилди

Жорий йилнинг 10 июль куни кечаси америкалик баскетболчи Кайна Рочфорд Нью-Йоркдаги турнирда ўйинлар оралиғидаги танаффус пайтида отиб ўлдирилди. Бу ҳақда полицияга таяниб, “New York Post” газетаси хабар берди.

Ҳуқуқ-тартибот идоралари маълумотларига кўра, 35 ёшли спортчи бошидан ўқ еган. Отишмага унинг бошқа бир эркак билан жанжаллашиб қолгани сабаб бўлган. Ҳодиса оқибатида яна икки киши жароҳат олган. Улар барқарор ҳолатда шифохонага етказилган.

“Нью-Жерсидаги Фэрли Дикинсон университетининг энг кўзга кўринган ўйинчиларидан бири бўлган Кину Рочфорд Леннокс авенюсидаги “Мартин Лютер Кинг” тураржой мажмуасида ўтказилаётган “Kingdome Basketball Tournament” турнирида тахминан соат 22:30 атрофида бошидан ўқ еган”, дейилади хабарда.

Қўшнилардан бирининг айтишича, Рочфорд икки ўғил ва бир қиз фарзандлардан бири бўлган, унинг ота-онаси эса Тринидаддан АҚШга борган.

Мэр Зоҳран Мамдани ушбу отишмани қоралаган ва X ижтимоий тармоғида Рочфорднинг оиласи учун “чуқур қайғуда” эканини ҳамда “бу мантиқсиз зўравонлик тугаши кераклигини” ёзиб қолдирган.

Рочфорд Нидерландия, Исроил, Франция, Швейцария, Буюк Британия ва бошқа мамлакатлар клублари шарафини ҳимоя қилган.

Эслатиб ўтамиз, аввалроқ АҚШнинг Мичиган штати Дирборн шаҳридаги Fairlane Town Center савдо марказида содир бўлган отишма оқибатида икки киши ҳалок бўлганди, яна бир киши жароҳат олган эди.