Мутлақ рекорд: Хитой Россиядан 100 тонна олтин олиб чиқди

2026 йилнинг дастлабки етти ойида Россиядан Гонконгга 100 тонна олтин қуймалари олиб борилди. Натижада ўтган йилнинг шу даврига нисбатан етказиб бериш ҳажми уч бараварга ошди ва мавжуд статистика тарихидаги мутлақ рекордга етди. Бу ҳақда маҳаллий божхона маълумотларига таяниб, “Financial Times” хабар берди.

Қайд этилишича, нефть, ёғоч ва кўмирдан сўнг Хитой Россиядан олтин олиб чиқиш учун асосий йўналишга айланган. Украинадаги уруш бошланганидан кейин Россия олтини халқаро санкцияларга учраган ва дунёнинг асосий олтин бозорларида тақиқланган.

Жорий йилнинг август ойи бошига келиб, Осиёдаги энг йирик олтин савдоси ҳабларидан бири бўлмиш Гонконгга ўтган йилнинг бутун давридагидан (85 тонна) кўпроқ Россия олтини бориб тушган. Биргина июль ойида Гонконг бозорига Россиядан 23,1 тонна олтин олиб кирилган. Бу ўтган йилнинг бутун биринчи ярмидаги кўрсаткич билан деярли тенг.

Гонконгга бориб тушаётган олтиннинг катта қисми якунда Хитойга олиб чиқилади. Бунда кўплаб хитойлик олтин харидорлари уни айнан Гонконгда сақлашни маъқул кўради, чунки у ерда, XXРнинг қолган ҳудудидан фарқли ўлароқ, қимматбаҳо металл импортига чекловлар йўқ.

“Лондон биржаси (дунёдаги энг йирик бозор) Россия олтини учун ўз эшикларини ёпганидан сўнг, мамлакат етказиб берувчилари экспортни шарққа йўналтирмоқда”, дейди LSEG таҳлилчиси Дебажит Саха. 

“Financial Times”нинг ёзишича, Россиядан олтин оқими урушнинг биринчи йилидаёқ Хитойга ёпирилиб борган ва ўшандан бери Гонконг орқали 35 миллиард долларлик қимматбаҳо металл олиб чиқилган.

Бу йил олтин қазиб олувчилардан ташқари, Марказий банк ҳам Россияда қимматбаҳо металлнинг йирик сотувчисига айланган. Уруш харажатлари туфайли рекорд даражага етган бюджет дефицитини молиялаштириш учун у етти ой давомида ўз захираларидан тахминан 50 тонна қуйма ёки 1,6 миллион трой унциясини сотган. Халқаро валюта жамғармаси маълумотларига кўра, сотув ҳажми Россия учун 1998 йилги дефолтдан бери (ўшанда олтин захираси 3,8 миллион унцияга камайган) кузатилмаган ва иккинчи чоракда Россия МБни жаҳон марказий банклари орасида дунёдаги энг йирик олтин сотувчисига айлантирган.

Эслатиб ўтамиз, аввалроқ Нидерландия Марказий банки Нью-Йорк ва Оттавадан Лондонга 86 тонна олтинни олиб чиққани ҳақида хабар берилган эди. Ушбу қадамдан сўнг АҚШ Нидерландия олтин захираларининг энг йирик сақловчиси мақомини йўқотган.