“Мутлақо уйдирма”. Инфантино Трампдан ёрдам сўраганини рад этди

Халқаро футбол федерацияси (FIFA) президенти Жанни Инфантино АҚШ Президенти Дональд Трампнинг маъмурияти билан алоқалари мавжудлиги ҳақидаги хабарларни расман инкор этди. Бу ҳақда у “Reuters”га берган баёнотида маълум қилди.

Аввалроқ, Инфантино навбатдаги FIFA президентлик сайловида иштирок этиш учун Дональд Трамп маъмуриятининг қўллаб-қувватловини олишга ҳаракат қилаётгани ҳақида маълумотлар тарқалган эди. Кейинчалик АҚШ Давлат котиби ёрдамчиси Дилан Жонсон ҳам ушбу хабарлар ҳақиқатга тўғри келмаслигини билдирган.

“FIFA президенти АҚШ Президенти ёки унинг маъмуриятининг бирор аъзосига қўнғироқ қилмаган. Бу мутлақо уйдирма”, дейилади ташкилот баёнотида.

Маълумот учун, Жанни Инфантино 2016 йил февраль ойидан буён FIFA президенти лавозимида фаолият юритиб келмоқда.

Эслатиб ўтамиз, Жанни Инфантинонинг Жаҳон чемпионатининг тижорат активларини хусусий инвесторга сотиш режаси муваффақиятсизликка учрагач, унга нисбатан норозилик янада кучайди.

FIFA Жаҳон чемпионати каби йирик мусобақаларнинг тижорий ҳуқуқларини бошқарувчи ташкилотнинг тахминан 20 фоиз улушини сотиш орқали хусусий инвесторлардан 4,2 миллиард долларгача маблағ жалб қилишни режалаштирган эди. Бироқ, футбол конфедерациялари ва бошқа манфаатдор томонларнинг кескин қаршилиги туфайли ушбу ташаббус амалга ошмай қолди.