UEFA Инфантинони судга бериши мумкин

Европа футбол иттифоқи (UEFA) FIFA президенти Жанни Инфантинони судга бериш имкониятини кўриб чиқмоқда. Бу ҳақда “Financial Times” нашри хабар берди. 

Маълум қилинишича, UEFA Инфантинога расмий хат йўллаб, FIFA’нинг тижорат ҳуқуқларини сотиш режасига оид барча ҳужжат ва материалларни сақлаб қолишни талаб қилган.

“UEFA FIFA’нинг тижорат ҳуқуқларини сотиш режаси муносабати билан суд даъвоси қўзғатиш, арбитраж ишларини бошлаш ёки тартибга солувчи органларга мурожаат қилиш имкониятини фаол кўриб чиқаётганини расман маълум қилади. Шу муносабат билан сиз ушбу ишга дахлдор барча ҳужжат ва материалларни зудлик билан аниқлаб, сақлаш чораларини кўришингиз шарт. Ушбу билдиришномадан кейин тегишли материалларни йўқ қилиш, ўчириш, яшириш ёки йўқолишига йўл қўйиш – далилларни йўқ қилиш сифатида баҳоланиши мумкин”, дейилади UEFA йўллаган хатда.

Аваллроқ, FIFA янги ташкил этилган компаниянинг тахминан 20 фоиз улушини хусусий инвесторларга сотиш орқали 4,2 миллиард доллар жалб қилиш режасини эълон қилди. Мазкур компания FIFA’нинг оммавий ахборот воситалари ва тижорат ҳуқуқларини, жумладан, Жаҳон чемпионатига оид ҳуқуқларни бошқариши режалаштирилган эди.

ОАВларининг маълумотларига кўра, ушбу акцияларни АҚШ Президенти Дональд Трампнинг куёви Жаред Кушнернинг укаси Жошуа Кушнерга тегишли инвестиция жамғармаси сотиб олиши мумкин эди.

Бироқ UEFA таклиф тўлиқ бекор қилинмагунча, барча аъзо ассоциацияларга FIFA мусобақаларини бойкот қилишни тавсия қилди. Жорий йилнинг 1 август куни кечқурун эса Инфантино FIFA тижорат ҳуқуқларининг бир қисмини сотиш режасидан воз кечганини маълум қилди.