Мусобақа пайти америкалик теннисчининг ракеткаси ўғирлаб кетилди

“Ролан Гаррос” турнири вақтида америкалик теннисчи Фрэнсис Тиафонинг ракеткаси ўғирлаб кетилди. Бу ҳақда ATP рейтингида 22-ўринни эгаллаб турган теннисчи ижтимоий тармоқлар орқали маълум қилди.

“Бугун 14-кортда ажойиб муҳит ҳукм сурди. Аммо мен ғалабамни нишонлаётган пайтда ракеткамни олиб кетган мухлисга бир оғиз сўз айтмоқчиман. Илтимос, уни қайтариб беринг. Кейинги ўйиним учун иккита чипта билан сизга миннатдорлик билдираман”, деб ёзди Тиафо.

Ҳодиса иккинчи босқич учрашувидан сўнг содир бўлган. Унда америкалик теннисчи поляк спортчиси Хуберт Хуркачни 6/7, 7/6, 6/4, 6/7, 6/4 ҳисобида мағлуб этган эди.

Хуркачга қарши баҳс тўрт соатдан ортиқ давом этди. Ушбу ғалаба Тиафога 2023 йилдан бери илк бор Франция очиқ чемпионатининг учинчи босқичига чиқиш имконини берди. Энди унинг кейинги рақиби жаҳон рейтингида 115-ўринни эгаллаб турган португалиялик Жайме Фария бўлади.

Эслатиб ўтамиз, икки нафар ўзбекистонлик теннисчи Мария Тимофеева ва Полина Кудерметова “Ролан Гаррос” турнирининг саралаш баҳсларида иштирок этиб, мусобақанинг асосий баҳсларига йўлланма ололмаган эди.