“Моссад”нинг собиқ раҳбари Эрондаги жосуслар нега фош қилинганини айтди

Исроилнинг “Моссад” ташқи разведка хизмати собиқ раҳбари Давид Барнеа Эрон билан бўлиб ўтган 12 кунлик уруш бошида Тель-Авив оммавий ҳибсга олишларни бошлаш ва бу орқали ҳақиқий исроиллик агентларни аниқлашни қийинлаштириш мақсадида ўз агентларининг ушбу мамлакат ҳудудидаги фаолияти акс этган тасвирларни қасддан эълон қилганини маълум қилди. Бу ҳақда у Priority Summit анжуманида сўз очди.

“Операция бошланган куннинг ўзидаёқ “Моссад” логотипи туширилган расмий видеони дарҳол эълон қилганимизнинг сабабларидан бири у ердаги агентларимизни ҳимоя қилиш эди. Биз Эронда шунчалик кўп одам ҳибсга олинишига эришмоқчи эдикки, токи ҳокимият органлари хамирдан қил суғургандек асл агентларни ажрата олмасин ва якунда ҳаммани қўйиб юборсин. Дарвоқе, айнан шундай бўлди ҳам”, дейди у.

Унинг сўзларига кўра, низонинг иккинчи кунида Эрон ҳуқуқ-тартибот органлари 21 минг кишини ҳибсга олган. 

“Ҳатто уларнинг орасида бир ёки иккита агент қўлга тушган бўлса ҳам, якунда уларни қўйиб юборишга мажбур бўлишади, чунки ҳамманинг ҳикояси бир хил бўлади: мен кўчада кетаётгандим, машинада кетаётгандим ва мени ушлаб кетишди. Охир-оқибат ҳаммани қўйиб юборишди”, дейди Барнеа.

“Моссад” собиқ раҳбарининг айтишича, Исроил фойдасига айғоқчилик қилишда айбланиб Эронда ҳибсга олинган ёки қатл этилган одамларнинг бир қисми “Исроил разведкасига умуман маълум бўлмаган”.

“Моссад” агентларининг 99,9 фоизи ҳеч қачон фош этилмаган”, дея қўшимча қилган у.

Унинг қайд этишича, “Моссад” агентлари бўлажак операциядан хабардор бўлган ва ҳозиргача Теҳронда яшашда давом этмоқда. Шунингдек, у агентларнинг ҳар бирини шахсан ўзи тасдиқлаганини, чунки уларга ишониши кераклигини айтиб ўтган.

Анжуман давомида Барнеа “Ҳизбуллоҳ”га қарши пейжерлар билан ўтказилган операция ҳақида ҳам тўхталган. Унинг сўзларига кўра, операция олдидан инсон танасини тақлид қилувчи манекенларда “юзлаб синовлар” ўтказилган.

“Ҳар гал синов натижаларини кўрганимда, “портловчи модда миқдорини камайтиринглар”, дер эдим”, деб эслайди у “қизил чизиқлар”га ишора қилиб.

Шунингдек, у ушбу операциянинг “Ҳизбуллоҳ” учун учта асосий оқибатини ажратиб кўрсатган. Биринчиси сифатида у “жангчиларнинг жисмоний мағлубияти”ни, иккинчиси – “руҳий омилнинг издан чиқиши”ни, учинчиси сифатида эса “қўрқув”ни тилга олган.

Эслатиб ўтамиз, 12 кунлик Эрон-Исроил уруши 2025 йил 12 июнда, Исроил Эрондаги ядровий объектларга зарба берганида бошланган эди. Теҳрон эса Исроил шаҳарларига ракеталар ёғдириш ва дронларни учириш билан жавоб қайтарди.

Пейжерлар билан боғлиқ операция 2024 йилнинг кузида содир бўлганди. Ўшанда “Ҳизбуллоҳ” вакилларидаги пейжерлар ва бошқа электрон қурилмалар оммавий равишда портлаб кетган эди. Қурилмаларни портловчи моддалар билан “Моссад” разведкаси агентлари жиҳозлаган. Ушбу операция оқибатида 40 дан ортиқ киши ҳалок бўлган, яна 4 мингга яқин киши жароҳат олган.