Москвадаги парадда илк бор КХДР ҳарбийлари ҳам иштирок этади

Шимолий Корея ҳарбий хизматчилари жорий йилнинг 9 май куни Москвада СССРнинг фашистлар Германияси устидан қозонилган ғалабасининг 80 йиллигига бағишланган парадда иштирок этади. Бу ҳақда бугун, 16 январь куни Япониянинг NHK телеканали манбаларга таяниб хабар берди.

Унинг суҳбатдошларига кўра, КХДР ҳарбийларининг ушбу парадда иштирок этиши ҳақидаги қарор аллақачон қабул қилинган. Гап, эҳтимол, Шимолий Кореянинг ўнлаб ҳарбий хизматчилари ҳақида кетмоқда. Илгари КХДР ҳарбийлари Россиядаги “Ғалаба паради”да ҳеч қачон қатнашмаган эди. Бундан ташқари, NHK'нинг бошқа манбалари Шимолий Корея ҳарбий оркестри август ойи охирида Москвада бўлиб ўтадиган мусиқий тадбирда иштирок этиши ҳақида хабар бермоқда.

2024 йил 30 ноябрда унинг раҳбари, Россия Мудофаа вазири Андрей Белоусов ва Шимолий Корея етакчиси Ким Чен Ин ўртасидаги учрашувдан сўнг вазирлик матбуот хизмати Теlegram-каналида Москва Пхеньянни парадда иштирок этишга таклиф қилгани ҳақида ёзган эди.

15 январь куни Белоусов “Ғалаба паради”га тайёргарлик бошланганини эълон қилди. Бу йил у Москвада, саккизта қаҳрамон шаҳарда ва ҳарбий штаб-квартира жойлашган яна 19 шаҳарда ўтказилиши керак. Вазирнинг сўзларига кўра, парадга 19 “дўст” давлатдан ҳарбий қисмлар таклиф қилинган ва улардан 10 таси, жумладан, собиқ СССРнинг етти давлати иштирок этишини тасдиқлаган.

“Медуза” хабарига кўра, Кремль парадда АҚШдан юқори мартабали амалдор иштирок этишини кутмоқда.

“Парад шундай BRICS 2.0 саммитига айланиши мумкин – бу ҳеч қандай жиддий изоляция йўқлигини кўрсатади”, деган нашр манбаси.

Эслатиб ўтамиз, аввалроқ Украина Қуролли кучлари Россия шимолий кореяликларнинг ҳақиқий исмларини яшириш мақсадида уларга сохта ҳужжатлар бераётганини маълум қилганди. Украина махсус операциялар кучлари россияликларнинг бундай чоралар кўришини жанг майдонида йўқотишларни ва хорижий ҳарбийларнинг мавжудлигини яшириш учун қилаётганини тахмин қилмоқда.