Moskvadagi paradda ilk bor KXDR harbiylari ham ishtirok etadi

Shimoliy Koreya harbiy xizmatchilari joriy yilning 9 may kuni Moskvada SSSRning fashistlar Germaniyasi ustidan qozonilgan g‘alabasining 80 yilligiga bag‘ishlangan paradda ishtirok etadi. Bu haqda bugun, 16 yanvar kuni Yaponiyaning NHK telekanali manbalarga tayanib xabar berdi.

Uning suhbatdoshlariga ko‘ra, KXDR harbiylarining ushbu paradda ishtirok etishi haqidagi qaror allaqachon qabul qilingan. Gap, ehtimol, Shimoliy Koreyaning o‘nlab harbiy xizmatchilari haqida ketmoqda. Ilgari KXDR harbiylari Rossiyadagi “G‘alaba paradi”da hech qachon qatnashmagan edi. Bundan tashqari, NHK'ning boshqa manbalari Shimoliy Koreya harbiy orkestri avgust oyi oxirida Moskvada bo‘lib o‘tadigan musiqiy tadbirda ishtirok etishi haqida xabar bermoqda.

2024 yil 30 noyabrda uning rahbari, Rossiya Mudofaa vaziri Andrey Belousov va Shimoliy Koreya yetakchisi Kim Chen In o‘rtasidagi uchrashuvdan so‘ng vazirlik matbuot xizmati Telegram-kanalida Moskva Pxenyanni paradda ishtirok etishga taklif qilgani haqida yozgan edi.

15 yanvar kuni Belousov “G‘alaba paradi”ga tayyorgarlik boshlanganini e’lon qildi. Bu yil u Moskvada, sakkizta qahramon shaharda va harbiy shtab-kvartira joylashgan yana 19 shaharda o‘tkazilishi kerak. Vazirning so‘zlariga ko‘ra, paradga 19 “do‘st” davlatdan harbiy qismlar taklif qilingan va ulardan 10 tasi, jumladan, sobiq SSSRning yetti davlati ishtirok etishini tasdiqlagan.

“Meduza” xabariga ko‘ra, Kreml paradda AQSHdan yuqori martabali amaldor ishtirok etishini kutmoqda.

“Parad shunday BRICS 2.0 sammitiga aylanishi mumkin – bu hech qanday jiddiy izolyatsiya yo‘qligini ko‘rsatadi”, degan nashr manbasi.

Eslatib o‘tamiz, avvalroq Ukraina Qurolli kuchlari Rossiya shimoliy koreyaliklarning haqiqiy ismlarini yashirish maqsadida ularga soxta hujjatlar berayotganini ma’lum qilgandi. Ukraina maxsus operatsiyalar kuchlari rossiyaliklarning bunday choralar ko‘rishini jang maydonida yo‘qotishlarni va xorijiy harbiylarning mavjudligini yashirish uchun qilayotganini taxmin qilmoqda.