Москва Блинкеннинг Тошкент ва Остонага келишига қандай қараяпти?

Россия Марказий Осиё давлатлари билан фаол ҳамкорлик қилади, бу давлатлар билан муносабатларни ташқи сиёсатнинг устувор йўналиши деб билади. Бу ҳақда Россия Федерацияси Президенти матбуот котиби Дмитрий Песков бугун, 28 февраль куни журналистларга АҚШ Давлат котиби Энтони Блинкеннинг Қозоғистонга ташрифи Россия Федерацияси ва Марказий Осиё давлатлари ўртасидаги муносабатларга таъсир қилиши мумкинлиги ҳақида гапирар экан айтиб ўтди. 

“Бизнинг Марказий Осиё давлатлари билан ўзимизнинг икки томонлама муносабатларимиз бор, ўз ҳамкорлик форматларига эгамиз, уларнинг бир қатори билан бизни Евроосиё иқтисодий иттифоқининг интеграция жараёнлари бирлаштиради: биз нимага эътибор қаратамиз, нимага қизиқамиз ва нималарни ташқи сиёсатимизда устувор деб ҳисоблаймиз”, дейди Кремль вакили. 

У АҚШ Давлат котибининг ташрифи ҳақида батафсилроқ изоҳ бермади ва бу ташқи сиёсат департаменти вакилларининг ваколати эканини тушунтирди. 

Эслатиб ўтамиз, кеча, 27 февраль куни кечқурун АҚШ Давлат департаменти раҳбари Энтони Блинкен илк расмий ташриф билан Қозоғистонга келди. Бугун у Қозоғистон Президенти Қосим-Жомарт Тўқаев қабулида бўлди. Учрашув чоғида республика раҳбари АҚШ билан стратегик ҳамкорликни ривожлантиришга тайёр эканини айтди.

Марказий Осиё давлатлари ва АҚШ Ташқи ишлар идоралари раҳбарлари 28 февраль куни Қозоғистон пойтахти Остонада C5+1 форматида энергетика, иқтисодиёт ва терроризмга қарши кураш масалалари, шунингдек, халқаро муаммолар, жумладан, Украина атрофида вазиятни муҳокама қилади.

C5+1 формати Марказий Осиёнинг бешта давлати (Қозоғистон, Қирғизистон,  Тожикистон, Туркманистон, Ўзбекистон) ва АҚШ ўртасидаги ўзаро ҳамкорликнинг кўп томонлама механизми ҳисобланади. У 2015 йилда иқтисодиёт, экология ва хавфсизлик соҳаларидаги минтақавий муаммоларни муҳокама қилиш учун ташкил этилган. Қозоғистондан кейин Давлат департаменти раҳбари бугун, 28 февраль оқшомида Тошкентга келади. 1 март куни Нью-Деҳлига жўнаб кетади.