Кремль Зеленскийнинг икки ойлик сулҳ бўйича таклифига жавоб қайтарди

Кремль Украина Президенти Владимир Зеленскийнинг 60 кунлик сулҳ шарти билан Украинада президентлик сайловларини ўтказиш ҳақидаги таклифига изоҳ берди ва Москванинг ушбу масала бўйича позицияси билдирилди. Бу ҳақда бугун, 12 октябрь куни Россия Президентининг матбуот котиби Дмитрий Песков журналистлар билан суҳбатда сўз очди.

“Биз сулҳни эмас, узоқ муддатли тинчликни хоҳлаймиз ва бунинг учун қўлимиздан келган барча ишни қилишга тайёрмиз”, дейди у.

Песковнинг сўзларига кўра, агар Киев ҳақиқатан ҳам сайлов ўтказишни хоҳласа, Россия Президенти Владимир Путин сайлов куни Украинага зарба бермаслик ҳақида кўрсатма беришга тайёр бўлади.

“Президент бу ҳақда аллақачон айтган эди, аммо бу сафар ҳам у кишининг номидан тўлиқ масъулият билан айта оламанки, агар Киевда ҳақиқатан ҳам сайлов ўтказишни хоҳлашса, Россия Федерацияси Президенти, Олий бош қўмондон Украинага сайлов куни – айнан сайлов кунида зарбалар бермаслик ҳақида кўрсатма беришга тайёр”, дейди Песков.

Бундан ташқари, АҚШ етакчиси Дональд Трамп томонидан эълон қилинган Россия ва Украина ўртасидаги эҳтимолий энергетик сулҳ масаласи бўйича мулоқотлар давом этмоқда.

У келишувга эришилган-эришилмагани ва у қандай шартларда амал қилиши мумкинлигига аниқлик киритмаган. Шунингдек, у бу сулҳ фақат нефтни қайта ишлаш заводларига тааллуқли бўладими ёки бошқа энергетика объектларига ҳам тегишлими, деган саволни изоҳлашдан бош тортган. Матбуот котиби барча маълумотлар кейинроқ берилишига ишончи комил эканини айтган.

“Ушбу мавзу бўйича сизга айтадиган гапимиз бўлиши билан, албатта, хабардор қиламиз”, дейди у.

Песков, шунингдек, Москва баҳосига кўра, Европа мамлакатлари тинч йўл билан ҳал қилишга тўсқинлик қилаётганини, америкалик музокарачиларнинг ҳаракатларини эса Россия томони ижобий баҳолаётганини таъкидлаган.

“Европаликлар аниқ тинчлик партиясига, тинч йўл билан ҳал қилиш йўлларини излаётган партияга мансуб эмас. Европаликлар – бу урушни тўхтатишга йўл қўймаслик учун ҳамма нарсани қилишда давом этаётган уруш партиясидир. Америкалик музокарачиларнинг ҳаракатлари бизга кўпроқ маъқул келмоқда”, дейди матбуот котиби.

Сўзида давом этиб, у Россия томони бу ерда “бўлиниш изламаётганини”, аксинча, тинч йўл билан ҳал қилишга имкон берадиган чора-тадбирлар ва қарорлардан манфаатдор эканини алоҳида таъкидлаган.

Эслатиб ўтамиз, аввалроқ АҚШ Президенти Дональд Трамп Украина Президенти Владимир Зеленский ўрнига янги раҳбар сайлаш вақти келганини айтганди. У Зеленскийни Россиянинг нефтьни қайта ишлаш заводларига ҳужум қилиш орқали жаҳон бозорида дизель ёнилғиси таъминотига зарар етказаётганликда айблаган эди. Зеленский эса агар Россия Президенти Владимир Путин 60 кунлик сулҳга рози бўлса, Украинада сайловлар ўтказилишини маълум қилди.