Молдовадаги президентлик сайловида Санду ғалаба қозонди

Молдованинг амалдаги Президенти Майя Санду президентлик сайловларининг иккинчи босқичида 55,04 фоиз, унинг рақиби Александр Стояногло эса 44,96 фоиз овоз олди. Бу Марказий сайлов комиссияси томонидан бюллетенларнинг 98,92 фоизи санаб чиқилгандан сўнг эълон қилинган овоз беришнинг дастлабки натижаларидир.

Молдованинг ўзида бюллетенларнинг 100 фоизи санаб чиқилди. МСК маълумотларига кўра, мамлакат ичида аҳоли асосан Стояноглога овоз берган. У 36 та ҳудуднинг 19 тасида ғолиб чиқди. Санду 48,81 фоиз овоз олган. Ўз навбатида, хорижий участкаларда бюллетенларнинг 89,18 фоизи санаб чиқилгандан сўнг, Санду 82,33 фоиз натижа билан етакчилик қилмоқда. Стояногло 17,67% га эга.

Молдованинг амалдаги раҳбари Майя Санду президентлик сайловларининг иккинчи босқичида ғалаба қозонганини эълон қилди.

“Молдова, бугун сиз ғалаба қозондингиз. Биз биргаликда бирлигимиз, демократиямиз ва муносиб келажакка содиқлигимизни намойиш қилдик. Раҳмат, азиз молдоваликлар”, деб ёзди у Х саҳифасида.

Европа комиссияси раҳбари Урсула фон дер Ляйен Молдованинг амалдаги Президенти Майя Сандуни президентлик сайловларининг иккинчи босқичидаги ғалабаси билан табриклади.

“Бу сайловда дуч келадиган қийинчиликларни енгиш учун камдан кам куч керак. Мен Молдова ва унинг халқининг Европа келажаги йўлида сиз билан ҳамкорликни давом эттиришни интиқлик билан кутаман”, деб ёзди Еврокомиссия раҳбари Х ижтимоий тармоғида.

Франция Президенти Эммануэль Макрон ҳам Сандуни қайта сайлангани билан табриклаб, демократия “барча аралашув ва манёврлардан устун келганини” айтди.

Руминия Бош вазири Марчел Чолакунинг таъкидлашича, европапараст Президентнинг ғалабаси “Молдова халқининг демократияни ҳимоя қилиш ва Европа Иттифоқига қўшилиш йўлини таъминлашга бўлган иродасининг яққол далилидир”.

Польша ҳукумати раҳбари Дональд Туск ҳам Молдовадаги сайлов натижаларига изоҳ берди. Тускнинг сўзларига кўра, амалдаги президент Россиянинг “президентлик сайловларига тажовузкор ва кенг кўламли аралашувига” қарамай, “Москва фаворити” устидан ғалаба қозона олган. Польша Бош вазири бу тенденция бошқа мамлакатларда ҳам “яқин кунлар ва ойларда” давом этишига умид билдирди.