Мисрда иккита йўловчи поезди тўқнашди. Қурбонлар бор (видео)

Миср пойтахти Қоҳира жанубида икки йўловчи поезд тўқнашди. Ҳодиса оқибатида 7 киши, жумладан, поезд машинисти ҳалок бўлди, камида 125 киши жароҳатланди. Бу ҳақда “Associated Press” хабар берди.

Маълум қилинишича, ҳалокат кеча, 8 ноябрь куни Гиза вилоятининг Ал-Айят туманида, Қоҳирадан 52 километр жанубда содир бўлган. Миср Транспорт вазирлиги маълумотига кўра, жануби-ғарбийдаги Фаюм вилоятига кетаётган поезд Асвон вилоятига йўл олган бошқа поезднинг орқа қисмига келиб урилган.

Бош прокуратура идораси терговчилари воқеа жойида текширув ўтказган. Дастлабки маълумотларга кўра, Фаюм–Гиза йўналишидаги поезд айни йўлда тўхтаб турган Қоҳира–Асвон поездининг охирги вагонига келиб урилган. Ҳар икки поезд бир йўналишда ҳаракатланган.

Миср Соғлиқни сақлаш вазирлиги жароҳатланганларнинг 70 нафардан ортиғи тиббий ёрдам кўрсатилганидан кейин шифохонадан чиқарилганини билдирган.

Ҳодиса содир бўлган ҳудуд аҳолиси поезд ичида қолиб кетган йўловчиларни қутқаришга ёрдам берган. Маҳаллий аҳоли вакили Айман Гамалнинг айтишича, у жароҳатланганларнинг қарийб 80 нафари тез ёрдам машиналарида шифохоналарга олиб кетилганини кўрган. Унинг сўзларига кўра, тўхтаб турган поезд вагонларидан бирида қолиб кетган айрим йўловчилар ташқарига чиқарилганида аллақачон вафот этган бўлган.

Ҳалокатдан омон қолган Фарҳа Гамалнинг айтишича, тўқнашувдан кейин айрим вагонлар бутунлай пачоқ бўлиб кетган. Йўловчилар ҳавога кўтарилган чанг сабаб нафас олишга ҳам қийналган. Уларни яқин атрофдаги қишлоқлар аҳолиси вагонлардан олиб чиққан.

Миср Президенти Абдулфаттоҳ ас-Сисий ҳалокат сабабларини аниқлаш учун зудлик билан тергов ўтказишни буюрган. Вайроналарни олиб ташлаш ва поездлар қатновини тиклаш учун воқеа жойига фавқулодда хизматлар ҳамда кранлар юборилган.

Эслатиб ўтамиз, аввалроқ Испания марказидаги Толедо провинциясида иккита юқори тезликда ҳаракатланувчи поезд тўқнашиб кетган эди. Оқибатда 64 киши ҳалок бўлиб, яна 80 га яқин йўловчи жароҳат олган, улардан 50 нафари оғир жароҳатланган.