Мирзиёев Олмаотага етиб борди

Ўзбекистон Президенти Шавкат Мирзиёев бугун, 29 март куни Қозоғистонга амалий ташриф билан етиб борди. Бу ҳақда Оқўрда хабар берди.

Олий мартабали меҳмонни Олмаота аэропортида Қозоғистон Президенти Қосим-Жомарт Тўқаев кутиб олди.

Ўзбекистон етакчиси шарафига фахрий қоровул сафланди ва икки мамлакат байроқлари кўтарилди.

Ўзбекистон Президенти матбуот хизматининг маълум қилишича, бугун Ўзбекистон ва Қозоғистон Президентлари норасмий учрашув ўтказади. Кун тартибидан савдо, саноат кооперацияси, транспорт ва логистика, энергетика, қишлоқ ва сув хўжалиги соҳаларида амалий ҳамкорликни кенгайтириш, шунингдек, ҳудудлар ўртасидаги фаол алоқалар ва маданий-гуманитар алмашинувни давом эттириш масалалари ўрин олган.

Давлат раҳбарлари халқаро сиёсат ва минтақавий ҳамкорлик масалалари юзасидан ҳам фикр алмашадилар.

Шунингдек, Президентлар Олмаота шаҳрининг бир қатор жойларига ташриф буюриши кутилмоқда.

Маълумот учун, 2023 йил 3 март куни Ўзбекистон Республикаси Президенти Шавкат Мирзиёев ва Қозоғистон Президенти Қосим-Жомарт Тўқаев Остонада эмас, Тошкентда эмас, айнан кутилмаганда Чимкентда норасмий учрашган эди. Мирзиёев ва Тўқаевнинг кейинги учрашуви 2024 йил 5 апрель куни Хоразмда бўлиб ўтди.