Мирзиёев 63 ёшга тўлган Алиевга табрик йўллади

Ўзбекистон Республикаси Президенти Шавкат Мирзиёев Озарбайжон Республикаси Президенти Илҳом Алиевнинг туғилган куни муносабати билан табрик мактуби йўллади. Бу ҳақда Озарбайжон Президентининг матбуот хизмати хабар берди.

“Ҳурматли Илҳом Ҳайдар ўғли, қадрли биродарим. Сизни таваллуд кунингиз муносабати билан чин юракдан табриклайман ва энг эзгу тилакларимни изҳор этишдан катта мамнуният туяман”, дейилади табрик аввалида.

Шавкат Мирзиёев Илҳом Алиевни Озарбайжон Республикасининг ҳар томонлама ривожланишига, мамлакат ҳудудий яхлитлиги ва тарихий адолатнинг тикланишига, аҳоли фаровонлигининг ошишига, шунингдек, халқаро майдонда давлат обрўйининг мустаҳкамланишига бағишланган мислсиз хизматлар кўрсатган йирик давлат ва сиёсат арбоби, халқининг фидойи фарзанди сифатида танишини билдирган.

Мирзиёев Алиевнинг Ўзбекистон билан Озарбайжон ўртасида қадимдан мавжуд бўлган тарихий дўстлик алоқаларининг янада мустаҳкамланишига, кўп қиррали ва узоқ муддатли ўзаро муносабатларнинг кенгайишига қўшган ҳиссасини юксак баҳолаган. Мамлакатлар ўртасидаги ўзаро ишонч, бир-бирини қўллаб-қувватлаш руҳида қурилган стратегик шериклик муносабатлари дўст халқларнинг умумий тараққиёти йўлида янада мустаҳкамланиши ва ривожланишига умид билдирилган.

Табрик якунида эса Шавкат Мирзиёев озарбайжонлик мавқедошини туғилган куни муносабати билан қутлаб, унга ва оила аъзоларига узоқ умр, мустаҳкам соғлик, бахт-саодат, халқининг фаровонлиги йўлида олиб бораётган фаолиятида улкан муваффақиятлар, қардош Озарбайжон халқига эса тинчлик, доимий юксалиш ва фаровонлик тилаган.

Маълумот учун, Илҳом Алиев 1961 йил 24 декабрда Озарбайжон пойтахти Бакуда туғилган. У Озарбайжоннинг учинчи президенти Ҳайдар Алиевнинг ўғли ва давомчиси саналади. Илҳом Алиев 2003 йилдан бери давлат раҳбари лавозимини эгаллаб, отасининг сиёсатини давом эттирмоқда. У беш марта (2003, 2008, 2013, 2018, 2024 йилларда) президентлик сайловларида ғалаба қозонган.

Эслатиб ўтамиз, жорий йилнинг 6 декабрь куни Шавкат Мирзиёев Қирғиз Республикаси Президенти Садир Жапаровни туғилган куни билан табриклаган эди.