“Металлург” футбол клуби фаолияти қайта тикланди

2024 йилда фаолиятини тўхтатган Ўзбекистонинг энг қадимги жамоаларидан бири бўлган Бекободнинг “Металлург” футбол клуби ўз фаолиятини тиклади. Бу ҳақда Ўзбекистон футбол ассоциацияси матбуот хизмати хабар берди.

Маълумот учун, мазкур клубнинг фаолияти 2024 йилда тўхтатилган эди. Ўша мавсумда Суперлиганинг энг қуйи поғоналарида жой олиб ўтиш ўйинларида иштирок этган жамоа энди орадан бир мавсум ўтиб, яна ўз фаолиятини қайта йўлга қўймоқда. Маълумотларга кўра, “Металлург” янги мавсумдан Про-лигада иштирок этади. 

Шунингдек, клуб раҳбариятига Улуғбек Мирзаев бош директор этиб тайинланди. Илҳом Мўминжонов эса жамоа бош мураббий лавозимини эгаллади.

“Металлург” клуби 1945 йилда ташкил этилган ва узоқ вақт давомида Бекобод спорт саҳнасида муҳим ўринни эгаллаб келган, Суперлига ва Биринчи лигада иштирок этган. Уларнинг энг муваффақиятли йили 2002 йил бўлиб, ўшанда жамоа Суперлигада бешинчи ўринни эгаллаган эди.