Мелони Трампни ёлғончиликда айблади (видео)

Италия Бош вазири Жоржа Мелони АҚШ Президенти Дональд Трампни ёлғончиликда айблаб, унинг италиялик журналистга берган интервьюсида Мелони Трамп билан суратга тушиш учун “ёлворгани” ҳақидаги баёнотини уйдурма деб атади. Бу ҳақда Италия ҳукумати раҳбари ўз баёротида маълум қилди.

Қайд этилишича, Трамп Италиянинг “La7” телеканалига берган қисқа интервьюсида Мелони билан суратга тушгани ҳақида сўз очган.

“Мелони мен билан гаплашганидан хурсанд бўлгандир. Мен у билан гаплашишим шарт эмасди. У мен билан суратга тушишни жуда хоҳлади ва шуни сўради. Аслида суратга тушмасдим, лекин унга раҳмим келди”, деган АҚШ раҳбари.

Бу сўзлар Италия ҳукуматида кескин норозиликка сабаб бўлган. Мелонинг ўзи махсус баёнот билан чиқиб, Трампнинг айтганлари ҳақиқатга тўғри келмаслигини билдирган.

“Дональд Трампнинг баёнотлари бутунлай ўйлаб топилган. Ростини айтсам, ҳайратдаман. Нега АҚШ Президенти ўз иттифоқчиларига нисбатан бундай муносабатда бўлаётганини тушунмайман. Бу биринчи марта эмас”, деган у.

Шунингдек, Мелони Трампни Ғарбнинг рақибларига нисбатан кўпроқ мулойимлик кўрсатаётганликда ҳам танқид қилган.

“Афсуски, у Ғарб ва АҚШнинг душманларига қарши ҳам худди шундай қатъият кўрсатмаяпти. Бир нарсани эслаб қолиши керак: на мен ва на Италия ҳеч қачон бировга ёлвормайди”, деган Италия Бош вазири.

Можаро ортидан Италия Ташқи ишлар вазири Антонио Таяни келаси ҳафтага режалаштирилган АҚШ сафари бекор қилинганини маълум қилган. Унинг сўзларига кўра, Президент Трампнинг Бош вазир Жоржа Мелонига нисбатан айтган ҳақоратомуз сўзлари бутун Италияни ҳақорат қилади.

Мелонининг энг яқин сиёсий ҳамкорларидан бири, Бош вазир девони давлат котиби Жованбаттиста Фаццолари ҳам Трампни қаттиқ танқид қилган. Унинг фикрича, Трамп қасддан ёки ноўрин хатти-ҳаракатлари орқали АҚШ ва Европа ўртасидаги тарихий муносабатларга путур етказмоқда.

“Унинг ноўрин чиқишлари АҚШни бутун Европа бўйлаб номақбул давлатга айлантириб қўйди. Бу нафақат Европага, балки энг аввало АҚШнинг ўзига зарар етказмоқда”, деб таъкидлаган Фаццолари.

Қайд этиш жоиз, Мелони аввал Трампнинг Европадаги энг яқин сиёсий тарафдорларидан бири ҳисобланган. У ҳатто 2025 йилдаги инаугурация маросимида қатнашган ягона Европа етакчиси бўлган. Бироқ жорий йилда Эрон билан боғлиқ можаро юзасидан Трамп ва Мелони ўртасида келишмовчиликлар пайдо бўлган ва икки томон муносабатлари совий бошлаган эди.

Эслатиб ўтамиз, аввалроқ АҚШ Президенти Дональд Трамп “Катта еттилик” (G7) саммитининг ривожланиш масалаларига бағишланган сессияларидан бирига кечикиб етиб борган ва хонага киришда ҳазил аралаш “Бу ерда хўжайин менман” (I'm the boss), деб айтган эди.