Мелания Трамп Путин билан алоқа канали ўрнатилганини айтди

АҚШнинг биринчи хоними Мелания Трамп Россия Президенти Владимир Путин билан “очиқ алоқа канали” ўрнатилганини маълум қилди. Бу ҳақда у кеча, 10 октябрь куни Оқ уйдан жонли эфирда узатилган махсус мурожаатида сўз очди.

Мелания Трампнинг айтишича, у сўнгги уч ой давомида Владимир Путин билан украиналик болаларни қайтариш масаласида “очиқ алоқа каналини” сақлаб келмоқда.

“Шундан бери Президент Путин билан менинг ўртамда бу болаларнинг фаровонлиги юзасидан очиқ алоқа канали мавжуд. Сўнгги уч ой ичида томонлар бир неча норасмий учрашувлар ва телефон суҳбатларида иштирок этишди – буларнинг барчаси эзгулик руҳида ўтди”, дейди Трамп.

У Украинадаги можародан жабр кўрган барча болалар учун соғлиғига оид маълумотларнинг шаффоф бўлишини таъминлаш ҳамда “болаларнинг ўз оилалари билан мунтазам бирлашишига кўмаклашиш”ни ўзининг миссияси деб билишини қайд этган. Мелания Трампнинг айтишича, сўнгги 24 соат ичида саккиз нафар бола ўз оилаларига қайтган.Шунингдек, АҚШ биринчи хоними Украинадаги тинчлик “яқин орада тикланишига” умид билдирган.

“Мен тинчлик тез орада келишига ишонаман. У бизнинг болаларимиздан бошланиши мумкин”, дейди АҚШ Президентининг рафиқаси.

Эслатиб ўтамиз, аввалроқ Дональд Трамп Оқ уйдаги ҳукумат йиғилишида Ғазо бўйича эришилган келишувларни шарҳлар экан, Украина можароси ҳам ҳал этилишини айтганди.