Мажбурий меҳнат учун жарима 10 баравар оширилди
Жамият
−
29 Август 2019
4933Ўзбекистон Республикаси Президенти Шавкат Мирзиёев “Айрим қонун ҳужжатларига ўзгартиришлар киритиш тўғрисида”ги қонунни имзолади. Бу ҳақда Адлия вазирлигининг "Ҳуқуқий ахборот" каналида хабар берилди.
Қонунга мувофиқ:
• никоҳ ёши эркаклар ва аёллар учун 18 ёш этиб белгиланди (ҳозирда аёллар учун 17 ёш);
• маъмурий тартибда меҳнатга жалб қилганлик учун жавобгарлик оширилиб, энг кам иш ҳақининг ўн бараваридан ўттиз бараваригача миқдорда жарима солишга сабаб бўлиши белгиланди (ҳозирда бир баравардан уч бараваригача). Агар ушбу ҳуқуқбузарлик такроран содир этилса энг кам иш ҳақининг 30 бараваридан 100 бараваригача жарима солинади.
Вояга етмаган шахсни мажбурий меҳнатга жалб этиш энг кам иш ҳақининг ўттиз бараваридан эллик бараваригача (ҳозирда беш бараваридан ўн беш бараваригача), агар бу ҳуқуқбузарлик такроран содир этилса энг кам иш ҳақининг эллик бараваридан юз бараваригача миқдорда жарима солишга сабаб бўлиши белгилаб қўйилди.
Бундан ташқари, вақтинча меҳнатга қобилиятсизлик, ҳомиладорлик ва туғиш нафақаларини қонун ҳужжатларида белгиланган миқдорларда тўлаш бўйича мажбуриятни маъмурий жазога тортилгандан кейин такроран бажармаслик энг кам иш ҳақининг ўн беш бараваридан ўттиз бараваригача миқдорда жарима солишга сабаб бўлиши белгиланди.
Ушбу Қонун расмий эълон қилинган кундан эътиборан кучга киради.
Қонуннинг никоҳ ёши белгиланишига оид қисми 2019 йилнинг 1 сентябридан кучга киради.
LiveБарчаси