Марадонанинг ЖЧдаги сардорлик боғичи ярим млн долларга сотилди

Аргентиналик афсонавий футболчи Диего Марадонанинг 1986 йилги Жаҳон чемпионатида таққан сардорлик боғичи кимошди савдосида 512 минг долларга сотилди. Бу ҳақда Sotheby’s аукцион уйи матбуот хизмати хабар берди.

Марадона ушбу боғични 1886 йилги Жаҳон чемпионатининг барча учрашувлари, жумладан, Англияга қарши чорак финал баҳсида (2:1) ҳам тақиб майдонга тушган. Ўша учрашувда Марадона икки гол урган ва улардан бирини қўл билан киритган. Кейинчалик бу гол футбол тарихида машҳур “Худонинг қўли” номи билан танилган.

Маълумот учун, Диего Армандо Марадона футбол тарихидаги энг буюк ва бетакрор ўйинчилардан бири бўлиб, у 1960 йил 30 октябрда Аргентинанинг Буэнос-Айрес шаҳри яқинида дунёга келган ва 2020 йил 25 ноябрда 60 ёшида вафот этган. Унинг футболчилик фаолиятидаги энг юқори чўққиси 1986 йилги Жаҳон чемпионатига тўғри келади. Ўшанда у сардор сифатида Аргентина терма жамоасини жаҳон чемпионлигига бошлаб борган.

Клублар миқёсида Марадона Аргентинанинг “Бока Хуниорс” ва Испаниянинг “Барселона” жамоаларида тўп сурган бўлса-да, унинг энг ёрқин ва муваффақиятли йиллари Италиянинг “Наполи” клуби билан боғлиқ. У ўртамиёна ҳисобланган Неаполь клубини ўз ортидан эргаштириб, икки бор Италия чемпионлиги ва UEFA кубогини олиб берган. Бу эса уни маҳаллий мухлислар учун ҳақиқий афсонага айлантирган. Бутун фаолияти давомида ўзининг ноёб дриблинги, тезкорлиги ва майдонни кўра олиш қобилияти билан ажралиб турган Марадона FIFA томонидан Пеле билан бир қаторда 20-асрнинг энг яхши футболчиси деб эълон қилинган. Футболчилик фаолиятини якунлагач, у мураббийлик билан ҳам шуғулланган ва 2008-2010 йилларда Аргентина терма жамоасини бошқарган.

Эслатиб ўтамиз, аввалроқ Бразилиянинг уч карра жаҳон чемпиони Пеленинг 1958 йилги Жаҳон чемпионати финалида кийган формаси кимошди савдосида қарийб 5 миллион долларга сотилгани ҳақида хабар берилганди.