Макрон “кўнгиллилар коалицияси” йиғилишини эълон қилди

Франция Президенти Эммануэль Макрон Россия ва АҚШ Президентлари – Владимир Путин ва Дональд Трампнинг учрашувидан сўнг, Украинага ёрдам кўрсатишга тайёр бўлган “кўнгиллилар коалицияси” учрашувининг ўтказилишини эълон қилди. Бу ҳақда у бугун, 16 август куни Х ижтимоий тармоғида ёзиб қолдирди.

Макроннинг айтишича, ҳар қандай барқарор тинчлик хавфсизлик кафолатлари билан бирга бўлиши керак. Шу муносабат билан у АҚШнинг бу жараёнга ҳисса қўшишга тайёрлигини олқишлаган. Франция Президенти ушбу коалиция аъзолари билан тез орада яна учрашиб, аниқ ютуқларга эришиш устида ишлаш ниятида эканини билдирган.

“Ҳар қандай барқарор тинчлик қатъий хавфсизлик кафолатлари билан бирга бўлиши керак. Шу муносабат билан, АҚШнинг бу жараёнга ҳисса қўшишга тайёрлигини олқишлайман. Биз бу масалада АҚШ ва “кўнгиллилар коалицияси”даги барча ҳамкорларимиз билан тез орада яна учрашиб, аниқ ютуқларга эришиш учун ишлаймиз. Шунингдек, сўнгги 30 йилик воқеалардан, хусусан Россиянинг ўз мажбуриятларини бажармасликдаги одатидан сабоқ олиш муҳим”, дея ёзган Франция Президенти. 

У қўшимча қилиб, Франция Дональд Трамп ва Владимир Зеленский билан яқин ҳамкорликни давом эттириб, Европа манфаатларини таъминлашга интилишини таъкидлаган.

Маълумот учун, кеча, 15 август куни АҚШнинг Аляска штатида Трамп ва Путиннинг учрашуви бўлиб ўтди. Учрашув Тошкент вақти билан бугун, 16 август куни соат 04:25 да якунланди. Аляскада бўлиб ўтган музокаралар якунида Трамп ва Путин биргаликдаги матбуот анжуманида қатнашди.

Эслатиб ўтамиз, аввалроқ Европа Иттифоқи (ЕИ) давлат раҳбарлари Аляскада Россия ва АҚШ Президентлари – Владимир Путин ва Дональд Трамп ўтказган саммит якунларига оид баёнот эълон қилганди. ЕИ етакчилари Россияга нисбатан янги санкциялар жорий этишга тайёр эканини билдирган. Улар Киевга қурол етказиб бериш ёки Украинани ЕИ ва НАТОга интеграциялашдан воз кечиш бўйича чекловларни рад этган.