Аляска саммитидан сўнг Европа Россияга янги санкциялар қўймоқчи

Европа Иттифоқи (ЕИ) давлат раҳбарлари Аляскада Россия ва АҚШ Президентлари – Владимир Путин ва Дональд Трамп ўтказган саммит якунларига оид баёнот эълон қилди.

ЕИ етакчилари Путин ва Трампнинг учрашувидан кейин Россияга нисбатан янги санкциялар жорий этишга тайёр эканини билдирган. Улар Киевга қурол етказиб бериш ёки Украинани ЕИ ва НАТОга интеграциялашдан воз кечиш бўйича чекловларни рад этмоқда. Бу Европа мамлакатлари раҳбарларининг АҚШ Президенти Дональд Трамп ва Украина раҳбари Владимир Зеленский билан музокаралари натижасида эълон қилинган биргаликдаги баёнотда қайд этилган. Баёнот эълон қилинишидан олдин ЕИ элчилари тезкор учрашув ўтказган.

Баёнотда Европа мамлакатлари Дональд Трампнинг можарони тўхтатишга қаратилган ҳаракатларини олқишлаётгани таъкидланган. Шу билан бирга, Европа етакчилари Украинага “пўлат каби мустаҳкам хавфсизлик кафолатлари” берилиши кераклигини таъкидлайди.

“Адолатли ва барқарор тинчлик ўрнатилмагунча санкцияларни кучайтиришни давом эттирамиз”, дейилади баёнотда. 

Шунингдек, унда Украина ўз ҳудудларига оид қарорларни мустақил қабул қилиш ҳуқуқи берилиши кераклиги, халқаро тан олинган чегаралар куч ишлатиш йўли билан ўзгартирилмаслиги қайд этилган.

“Украинадаги қон тўкилиши давом этаётган пайтда, Россияга босимни сақлашга тайёрмиз. Санкциялар ва кенгроқ иқтисодий чораларни кучайтириб, Россиянинг уруш иқтисодиётига босим ўрнатишни давом эттирамиз, шунда адолатли ва барқарор тинчлик ўрнатилади. Украина бизнинг собит ва қатъий бирдамлигимизга таяниши мумкин, чунки биз тинчликни яратишга ҳаракат қиламиз”, дея қўшимча қилинади баёнот матнида. 

Эслатиб ўтамиз, аввалроқ Дональд Трамп Владимир Зеленский ва Европа етакчилари билан видеоконференциядан сўнг, Россия билан мумкин бўлган тинчлик келишуви доирасида Киевга хавфсизлик кафолатларини беришга тайёрлигини айтганди.