Мадуро ҳибсга олинганда эгнида бўлган кийим трендга айланди

Венесуэла президенти Николас Мадуронинг Nike кийимидаги ҳибсга олинган сурати интернетда тарқалганидан сўнг, айнан шундай кийимга бўлган талаб кескин ошиб кетди. Бу ҳақда “The Economic Times” нашри маълум қилди.

Хабарда айтилишича, АҚШ Президенти Дональд Трампнинг буйруғи билан Мадуронинг қўлга олиниши ортидан Венесуэла етакчисининг эгнида бўлган кулранг Nike Tech Fleece костюми қидирув тизимларида оммалашган, харидорлар эса маҳсулот танқислигидан шикоят қила бошлаган. Костюм тўпламининг нархи эса 260 долларга етди. Шунга қарамай “Мадуроникидек” костюмга бўлган талаб ошишда давом этмоқда. 

Мадуронинг самолёт бортида тушган сурати тезда интернетда тарқалган ва ҳибсга олинган президентнинг ташқи кўриниши харидорларга ёқиб тушгани сабабли, Nike Tech Fleece костюми бўйича Google’даги қидирувлар кескин кўпайган. Шунингдек, фойдаланувчилар талаб ошгани боис маҳсулот етишмаслиги ҳақида хабар берган, aйниқса, Венесуэла раҳбарининг кийим ўлчами бўлган 3ХL ҳажмида танқислик кузатилган. 

Нашрнинг ёзишича, кулранг костюм ҳозирча компаниянинг расмий сайтида сотувда мавжуд. Тўплам нархи 260 доллар бўлиб, шундан 140 доллари куртка, 120 доллари шим нархига тўғри келади.