Ватикан АҚШ билан Мадуро бўйича махфий музокаралар ўтказган – ОАВ

Ватикан 2025 йил декабрь охирида АҚШни “сабрли бўлишга” ва Венесуэла етакчиси Николас Мадурога Россияга қочиб кетиш имконини беришга кўндиришга уринган. Бу ҳақда “The Washington Post” хабар берди.

Маълум қилинишича, Ватиканда Пападан кейин иккинчи шахс бўлган кардинал Пьетро Паролин декабрь ойининг охирида АҚШни Венесуеланинг собиқ етакчиси Николас Мадурога Россияда бошпана олиш имконини беришга кўндиришга ҳаракат қилган. 

“Мадурога лавозимни тарк этиб, пулларидан бемалол фойдаланиб яшаш таклиф қилинган. Ушбу таклифнинг бир қисми сифатида Россия Президенти Владимир Путин унинг хавфсизлигини кафолатлаган”, дейилади хабарда.

Нашрнинг ёзишича, Паролин Янги йил арафасида АҚШнинг Муқаддас Тахт ҳузуридаги элчиси Браян Бурчни зудлик билан ҳузурига чақирган ва Вашингтоннинг Венесуэла бўйича режаларига аниқлик киритишни талаб қилган. Нашр ҳукумат ҳужжатларига таяниб ёзишича, бир неча кун давомида таъсир доираси кенг бўлган италиялик кардинал АҚШ Давлат котиби Марко Рубио билан боғланишга уринган ва “Венесуэлада қон тўкилиши ва беқарорликнинг олдини олишга жон-жаҳди билан ҳаракат қилган.”

Бурч билан суҳбат чоғида, АҚШ Президенти Дональд Трампнинг иттифоқчиси бўлган элчига Паролин, хусусан, Москва Мадурога бошпана беришга тайёрлигини билдирган ва венесуелалик сиёсатчи бу таклифга рози бўлгунига қадар америкаликлардан сабр қилишни илтимос қилган.

Ватикан эса ўз навбатида махфий суҳбатдан парчаларнинг оммага ошкор қилингани ва уларнинг Рождество даврида бўлиб ўтган суҳбат мазмунини тўлиқ ва аниқ акс эттирмаётганидан норози эканини билдирган. Бурчнинг матбуот котиби ушбу масала бўйича барча саволларни АҚШ Давлат департаментига йўналтирган, бироқ у изоҳ беришдан бош тортган. 

Россия Президенти матбуот котиби Дмитрий Песков ҳам нашр сўровига жавоб бермаган.

Маълумот учун, Венесуэла Президентини қўлга олиш бўйича “Мутлақ қатъият” деб номланган операция 3 январга ўтар кечаси амалга оширилган. Каракас ва бошқа ҳудудлардаги стратегик обектларга ракета зарбалари берилган. Николас Мадуро ва унинг рафиқаси қўлга олиниб, АҚШга олиб кетилган. 

Уларга “наркотерроризм”, қурол сақлаш ва гиёҳванд моддалар контрабандаси бўйича айбловлар қўйилган ва улар АҚШда суд қилинади.

Эслатиб ўтамиз, аввалроқ АҚШнинг Венесуэлага қилган ҳужуми оқибатида 100 киши ҳалок бўлгани ҳақида хабар берилганди.