Трамп Мадурони ўзининг шахсий рақсини ўзлаштиришда айблади (видео)

АҚШ Президенти Дональд Трамп кеча, 6 январь куни Венесуэла етакчиси Николас Мадурони ўзининг машҳур рақс ҳаракатларини гарчи унчалик ўхшатолмаса-да такрорлашга ҳаракат қилганликда айблади. У бу ҳақда Вашингтондаги Конгресс республикачилари йиғилишида гапирди.  

Трампнинг сўзларига кўра, Мадуро саҳнага чиқиб, унинг рақсини қўпол тарзда такрорлашга ҳаракат қилган. Маълумотларга кўра, Венесуэла раҳбари ўзининг жамоат олдидаги рақс ҳаракатларини “No War, Yes Peace” шиори ремиксига бажарган, бу эса АҚШ ҳукуматини уни қўлга олиш қарорига олиб келган. 

Шунингдек, Оқ уй етакчиси Николас Мадурони зўравонлик қилган ва миллионлаб одамларни ўлдирганликда айблаган. Бундан ташқари, у Каракас марказида қийноқлар хонаси борлиги ҳақида ҳам гапирган, бироқ ушбу хона тафсилотларига тўхталмаган. 

Трамп йиғилишда ўзининг машҳур рақсига (YMCA) рафиқаси Мелания ва бошқаларнинг муносабатини ҳам айтиб ўтган. Унинг сўзларига кўра, ушбу рақси учун у илгари кенг танқидларга учраган. Жумладан унга кўпчилик расмий йиғилишларда ҳам YMCA’ни такрорлайвергани учун эътироз билдирган. Дональд Трампнинг айтишича, кейинчалик унинг тарафдорлари бу ҳаракатни мақтаган ва ўзлари ҳам такрорлаган. 

Президент шунингдек хотини Мелания Трампнинг фикрини ҳам келтирди:

“У менинг рақсга тушишимни ёқтирмайди. Мен унга айтдим: “Ҳамма рақсимни ёқтиради, азизам”. У эса одамлар аслида ёқтирмаслигини, фақат мен учун ўзларини шундай тутишини ва бу менга ёқимли бўлиб кўринаётганини айтди. Лекин мен унга қарши чиқдим ва саҳнага чиқсам, ҳамма мендан “Илтимос, рақсга туш” деб талаб қилишини эслатдим.

Эслатиб ўтамиз, аввалроқ Дональд Трамп ўзининг Truth Social тармоғида Венесуэла Президенти Николас Мадуро ва унинг рафиқаси қўлга олиниб, мамлакатдан олиб чиқиб кетилганини айтган эди.