Мьянмадаги зилзила қурбонлари 1600 дан ошди

Кеча, 28 март ва бугун, 29 март кунлари Мьянмада содир бўлган зилзила оқибатида 1644 киши ҳалок бўлди. Бу ҳақда расмийларга таяниб, “France 24” хабар берди.

Маълум қилинишича, ҳалок бўлганлардан ташқари яна 139 киши бедарак йўқолган, 3,4 минг киши жабрланган. Бедарак йўқолганларнинг топилишига расмийлар ҳам умид билдирмай қўйган.

Кўплаб шаҳарларда электр энергияси мавжуд эмас. Шу сабабли кўплаб маҳаллий ОАВлар ўз фаолиятини тўхтатиб туришга мажбур бўлган.

Шаҳар аҳолиси мунтазам ер силкинишларидан кейин тунни кўчаларда ўтказгани айтилмоқда.

Мьянманинг ғарбий қўшниси Ҳиндистон бугун, 29 март куни эрталаб зилзиладан энг кўп зарар кўрган ҳудудга гуманитар ёрдам жўнатган. Қолаверса, мамлакатга АҚШнинг ҳам ёрдами келиши кутилмоқда.

Силкинишлар Хитой, Таиланд ва Вьетнамда сезилган. Бангкокда қурилаётган бино қулаб тушган, 10 киши ҳалок бўлгани ва камида 50 киши жароҳатлангани маълум. Таиланд ҳукумати мамлакат пойтахтида фавқулодда ҳолат режимини эълон қилган.

Эслатиб ўтамиз, аввалроқ Мьянмада кучли зилзиладан сўнг яна бир 5,1 магнитудали зилзила қайд этилгани ҳақида хабар берилганди.