Лукашенко Шавкат Мирзиёев спиртли ичимлик ичмаслигини айтди

Беларусь Президенти Александр Лукашенконинг айтишича, Ўзбекистон раҳбари Шавкат Мирзиёев билан учрашув чоғида давлат раҳбарлари спиртли ичимлик ичмаган – фақат шарбат ичишган.

Ўзбекистон Республикаси Президенти Шавкат Мирзиёев 8 июль куни икки кунлик расмий ташриф билан Минскка борди. Шу куни кечқурун давлат раҳбарлари яккама-якка учрашув ва норасмий кечки овқат ўтказган. 9 июль куни икки давлат раҳбарларининг тор доирадаги музокаралари бўлиб ўтган.

Расмий кутиб олиш маросимидан сўнг биргаликда суратга тушиш маросими ўтказилди. Суратга тушиб бўлгач, тик оёқда журналистлар билан мулоқот қилган Президент Лукашенко “Аҳволимиз яхшими, қандай кўриняпмиз?” деб сўраган. 

“Кўринишимиз яхши, шундайми? Кеча ичмадик. Шарбат, фақат шарбат. [Ўзбекистон] президенти ичмайди”, дея ҳазиллашган Беларусь раҳбари.

Эслатиб ўтамиз, музокаралар якунида Ўзбекистон Республикаси Президенти Шавкат Мирзиёев ва Беларусь Республикаси Президенти Александр Лукашенко Стратегик шериклик муносабатларини ўрнатиш тўғрисидаги декларацияни имзолади.