Лукашенко Путин ва Трампни “императорлар” деб атади

Беларусь резиденти Александр Лукашенко Россия ва АҚШ Президентлари Владимир Путин ҳамда Дональд Трампни “императорлар” деб атади ва улардан фарқли ўлароқ, ўзига умумий муҳаббат керак эмаслигини қўшимча қилди. Бу ҳақда у RT телеканалига берган интервьюсида сўз очди. 

“Парвардигор вазиятни борича қабул қилишга мени ўргатди. У менга доим ҳамма сени севавермаслигини уқтирган. Мен Дональд Трамп ёки Владимир Путин каби император эмасман. Улар ўзларини севишлари ҳақида мулоҳаза юритишга қурбилари етади. Менда улардаги имкониятлар йўқ”, дейди Беларусь етакчиси.

У ўзини “Европанинг сўнгги диктатори” деб атайдиган Ғарб ОАВларини ўқишини қайд этган.

“Мен тажрибали одамман. Ўқийман: устимдан мағзава ағдаришади, диктатор ва ҳоказо дейишади. Бунга хотиржам қарайман... Менда диктаторлик қилиш учун ресурс йўқ. Мана Трампда бу ресурс бор ва у диктаторлик қилмоқда – Венесуэлада, Кубада, Эронда диктаторлик қилишга уринмоқда”, дейди у. 

Лукашенко, шунингдек, АҚШ Беларусдан “демократияни ўрганиши” кераклигини айтган. Унинг фикрича, Вашингтоннинг инсон ҳуқуқлари ҳақидаги гаплари “шунчаки валдираш”, Американинг бошқа мамлакатлардаги сиёсати эса демократиядан далолат бермайди. У АҚШ сиёсати демократия ва инсон ҳуқуқлари эмас, балки манфаатлар билан белгиланишини қайд этган.

Шунга қарамай, Лукашенко АҚШ билан “катта битим”га тайёр. 

“Америка Қўшма Штатларига боришни ва шунчаки Дональд Трампнинг қўлини сиқишни жуда ҳам истаб ёниб турганим йўқ”, дейди у. 

Лукашенконинг фикрича, Дональд Трамп Беларусь позициясини ўрганиб, уни Россияга проекция қилмоқда. Унинг сўзларига кўра, келишувга “сиёсий маҳбуслар”, шунингдек, элчихоналар фаолияти ва ядровий материаллар устидан назоратга оид масалалар киради.

Эслатиб ўтамиз, жорий йил бошида Лукашенко махсус вакил Жон Коул бошчилигидаги АҚШ делегацияси билан музокаралар ўтказган эди. Шундан сўнг Вашингтон “Белинвестбанк”, Тараққиёт банки, Молия вазирлиги, Беларусь калий компанияси ва “Беларуськалий”га нисбатан санкцияларни бекор қилди, Беларусь етакчиси эса 250 нафар маҳкумни афв этди.