Лукашенко хоккей ўйини вақтида жароҳат олди (видео)

Беларуслик Александр Лукашенко Минскдаги “Олимпик-Арена”да бўлиб ўтган хоккей ўйини чоғида йиқилиб тушди. Унинг орқа мушакларида чўзилиш аниқланган. У ўзини яхши ҳис қилаётганини маълум қилди.

“Оддий ишчи ҳолат: ўзингникларни ур, шунда бегона қўрқади. Ҳаммаси жойида. Кейинги ўйинга тайёргарлик кўряпман”, деди Лукашенко.

Лукашенконинг жамоаси Брест вилояти хоккейчиларига қарши майдонга тушган. Александр Лукашенко жамоадоши Ярослав Чуприс билан тўқнашиб кетган, у орқаси билан ҳаракатланаётган бўлган. Ўйин 5:5 ҳисобида дуранг билан якунланган.

71 ёшли Александр Лукашенко хоккейни ҳаваскорлар даражасида ўйнайди. 2021 йил декабрь ойида у Россия Президенти Владимир Путин билан бир жамоада ўртоқлик учрашувида майдонга тушган. Лукашенко ва Путиннинг жамоаси 18:7 ҳисобида ғалаба қозонган. Путин етти шайба уриб киритган, Лукашенко – иккита, унинг ўғли Николай эса тўртта шайба киритган.

2022 йил апрель ойида ҳаваскорлар ўртасидаги Республика мусобақаси вақтида Лукашенконинг юзига хоккей таёғи тегиб кетган. Шу йил баҳорида эса унинг жамоаси Республика хоккей лигаси ғолиби бўлди.