Санкциялар босими – бу бугунги кун ҳақиқати – Лукашенко ШҲТ саммитида

Ахборот, дипломатик, молиявий-иқтисодий ва бошқа санкциялар босими – бу бугунги кун ҳақиқати. Бу ҳақда бугун, 1 сентябрь куни Беларусь Президенти Александр Лукашенко Бишкекдаги “Ирис Ордо” конгресс-холлида ШҲТга аъзо давлатлар давлат бошлиқлари кенгашининг мажлисида сўз очди. 

“Глобал низолар ортиб бораётган бир шароитда ШҲТнинг шаклланаётган кўп қутбли дунё тартиботининг Евросиё маркази сифатидаги нуфузини мустаҳкамлаш ва амалда тасдиқлаш, ташкилотнинг ўзида ишнинг ҳар бир асосий йўналиши бўйича жипсликни таъминлаш муҳимдир”, дейди у.

Лукашенконинг айтишича, ушбу соҳадаги таҳдидлар ортиб бормоқда. Ахборот, дипломатик, молиявий-иқтисодий ва бошқа санкциялар босими – бу бугунги кун ҳақиқатидир. Дунё қудратлиларининг арсеналида эндиликда фақат рангли инқилоблар ва гибрид таъсир кўрсатиш технологияларигина эмас, ҳозирги вақтда тўғридан тўғри оммавий ҳарбий агрессия намойишкорона қайтиб келди. 

“Бундай таҳдидга бизнинг жавобимиз Евросиёда янги хавфсизлик архитектурасини шакллантириш, умумий ишонч ва ҳамкорлик майдонини яратиш бўлиши керак”, дейди Лукашенко.

Шунингдек, унинг айтишича, биргаликдаги ташаббуслар аниқ натижалар бериши, халқлар фаровонлигини мустаҳкамлаши ва давлатларнинг жипслашишига хизмат қилиши керак. 

“Биз сифатга ўтадиган ва кенг кўламли амалий ташаббусларга олиб келадиган учрашувлар сонини кутмоқдамиз”, дейди Беларусь етакчиси. 

Лукашенко, шунингдек, ШҲТ Тараққиёт банкининг тезроқ ташкил этилишини қатъий қўллаб-қувватлашини билдирган ва ўзаро ҳисоб-китобларда миллий валюталар улушини ошириш бўйича чора-тадбирларни олқишлаган.

“Беларусь ташкилотнинг ягона, очиқ ва хавфсиз рақамли маконини тезроқ яратиш тарафдори. Ахборот хавфсизлиги, рақамли ривожланиш ва сунъий интеллектдан фойдаланиш соҳасида тажриба алмашиш бўйича кенг кўламли дастурни ишга туширишни таклиф этамиз”, дейди Александр Лукашенко. 

Унинг сўзларига кўра, Беларусида ташкил этилаётган Сунъий интеллектни қўллаш соҳасида Хитой – ШҲТ ҳамкорлик маркази бундай алмашинувлар учун хабга айланиши мумкин.

Шунингдек, Лукашенконинг сўзларига кўра, ШҲТнинг ЕОИИ, МДҲ, КХШТ, ASEAN, Африка иттифоқи ва BRICS каби бошқа бирлашмалар билан алоқаларини кенгайтириш зарур. Ҳамкорликнинг турли форматларини уйғунлаштириш Шанхай ҳамкорлик ташкилотининг глобал иштирокчи сифатидаги ролини оширишга ёрдам беради.