Leapmotor хитойликлар иштирокида қайтадан синовдан ўтказилади

Хитойнинг Leapmotor автомобиллари Ўзбекистонда ушбу компания мутахассислари иштирокида қайта синовдан ўтказилади. Бу ҳақда Техник жиҳатдан тартибга солиш соҳасида назорат инспекцияси хабар берди.

Билдирилишича, Техник жиҳатдан тартибга солиш соҳасида назорат инспекцияси томонидан Leapmotor корхонасига нисбатан қўйилган чеклов юзасидан музокаралар давом этмоқда.

Яқин кунларда Leapmotor компанияси мутахассислари Ўзбекистонга ташриф буюриши режалаштирилган бўлиб, уларнинг иштирокида маҳсулотлар синови қайта ўтказилади. Синов жараёнлари Leapmotor мутахассисларининг иштирокида ўтказилиши белгиланган.

Эслатиб ўтамиз, аввалроқ ушбу компаниянинг C16 моделли автомобиллари Техник жиҳатдан тартибга солиш соҳасида назорат инспекцияси текширувидан ўтгани ва автомобиллардаги электромагнит шовқинлар БМТ меъёрларидан 16 баробар юқори экани, бунинг ортидан эса мазкур автомобилларнинг Ўзбекистонга импорти тақиқлаб қўйилгани хабар қилинган эди.

Кейинроқ эса электромобиллар савдоси билан шуғулланувчи тадбиркорлар ижтимоий тармоқлар орқали Президентга мурожаат йўллади. Эркин бозор тарафдори эканини айтган тадбиркорлар давлат раҳбаридан чекловларни олиб ташлаш ва очиқ бозорни қўллаб-қувватлашни сўраган. Мазкур ҳолат ортидан Бизнес-омбудсман муносабат билдириб, тадбиркорларнинг мурожаати қонун ҳужжатлари талабларига мувофиқлиги юзасидан Бизнес-омбудсман девони томонидан ўрганилаётганини маълум қилди.