Латвия шарқида Россия дрони қулади 

Латвия Россия ҳарбий дрони ҳалокатига оид тергов ишларини олиб бормоқда. Бу ҳақда кеча, 8 сентябрь куни Латвия Президенти Эдгарс Ринкевичс Х ижтимоий тармоғида маълум қилди.

Унга кўра, дрон 7 сентябрь куни Латвия шарқида ҳалокатга учраган.

“НАТОнинг шарқий қанотидаги шунга ўхшаш ҳодисалар сони ортиб бормоқда ва биз уларни биргаликда ҳал қилишимиз керак”, дейди Президент Рига ўз иттифоқчилари билан яқин алоқада эканлигини таъкидлаб.

Латвия Мудофаа вазирлигининг аниқлик киритишича, қурилма Ригадан 224 км шарқда жойлашган Резекне вилоятида қулаган.

Латвия Миллий Қуролли кучларининг дастлабки маълумотларига кўра, учувчисиз самолёт Беларусь йўналишидан ўз ҳаво ҳудудига учган. Миллий Қуролли кучлар ҳодиса ҳақида НАТО қўмондонлигини хабардор қилди. Латвия ҳукумати ва ҳуқуқ-тартибот идоралари, шунингдек, минтақадаги бошқа НАТО давлатлари воқеа ҳақида хабардор қилинган.

“Бу воқеа Рига Латвиянинг шарқий чегарасини мустаҳкамлаш, жумладан, ҳаво ҳужумидан мудофаа ва электрон уруш имкониятларини ривожлантириш устида ишлашни давом эттириши кераклигини тасдиқлайди”, дейди Мудофаа вазири Андрис Спрудс.

Россиянинг Украинадаги уруши муносабати билан Латвия қуруқлик чегаралари, ҳаво ҳудуди ва ҳудудий сувларини ҳимоя қилишни кучайтирмоқда. Миллий Қуролли кучлар мамлакатнинг шарқий чегарасида ҳаво мудофаасини кучайтирмоқда. НАТО иттифоқчилари Болтиқбўйи давлатлари устидан ҳаво патрул миссияларини айлантирмоқда.

“Латвия осмони НАТО ҳаво ҳудудининг бир қисмидир”, дея эслатди Мудофаа вазирлиги.

7 сентябрга ўтар кечаси Россия томонидан Украина ҳудудини ўққа тутаётганда камида саккизта дрон Беларусь ҳаво ҳудудига киргани маълум бўлди.