Кукурелья нима сабаб соч ўстиришини айтди

Испания терма жамоаси ва “Реал Мадрид” ҳимоячиси Марк Кукурелья аутизмга чалинган ўғли Матео уни майдонда таниб олиши осон бўлиши учун сочини ўстирганини айтди. Бу ҳақда “20 Minutos” нашри хабар берди.

“Менинг аутизмга чалинган ўғлим бор. Қани энди умуман пулим бўлмаганида эди, аммо ўғлим соғлом бўлганида. Мен сочимни ўстираман, чунки у буни ёқтиради ва агар мени унутиб қўйса ҳам, сочларим орқали таниб олади”, дейди футболчи.

Матеога 3 ёшида аутизм ташхиси қўйилган. Футболчининг рафиқаси Клаудия Родригес қўллаб-қувватлаш, топиш қанчалик қийин бўлганини эслади. Кукурелья эса бу ҳолатни қуйидагича изоҳлади:

“Ўғлингиз қийналаётганини кўрасиз, аммо унга қандай ёрдам беришни билмайсиз”.

Ҳозирда Кукурельянинг оиласи Лондонда, у ўғли Матео учун мос мактаб топган. Унинг ҳар бир кичик ютуғи оиласи учун катта қувончга айланган.

Футболчининг таъкидлашича, аутизмга чалинган ўғлини тарбиялаш унинг фаолиятига ҳам таъсир қилган.

“Қайси клуб менга қизиқиш билдирмасин, биринчи навбатда ўша ерда Матео учун мос мактаб ва терапия имкониятлари бор-йўқлигини текширамиз”, дейди у.

Эслатиб ўтамиз, Кукурелья жорий йилнинг 15 июнь куни “Челси”дан “Реал Мадрид”га ўтди. У 2022 йилдан буён Лондон клубида тўп суриб, 2025 йили Конференциялар лигаси ҳамда Клублар ўртасидаги Жаҳон чемпионатида ғолиб чиққан.

2026 йилги Жаҳон чемпионатида ҳимоячи Испания терма жамоасининг 8 та ўйинининг барчасида майдонга тушди, 3 та голли узатмани амалга оширди ва жамоасига тарихдаги иккинчи жаҳон чемпионлигини қўлга киритишга ёрдам берди. Шунингдек, у Родри ва Педро Порро билан бирга FIFA томонидан турнирнинг энг яхши рамзий жамоасига киритилди.