Криминал авторитет “Коля Қирғиз” жиноий гуруҳи аъзолари қўлга олинди

Қирғизистонлик марҳум криминал авторитет Қамчибек Кўлбоев (Қамчибек Асанбек)нинг уюшган жиноий гуруҳи собиқ аъзолари ушланди. Бу ҳақда “24.kg” хабар берди.

Нашрга кўра, ушбу 3 шахс бузғунчи сиёсий кучлар билан республикада минтақалараро вазиятни беқарорлаштириш, ҳокимиятни зўравонлик йўли билан эгаллаб олишга уриниш бўйича провокацион видеолавҳа тайёрлаган. Шунингдек, улар тадбиркорнинг катта миқдордаги пулини ўғирлаган.

Қайд этилишича, видеони ташкил қилиш ва тайёрлашда иштирок этганларнинг барчаси аниқланган. Ҳозирда тегишли тергов-тезкор тадбирлари давом эттирилмоқда.

Миллий хавфсизлик давлат қўмитаси ирқий, этник, миллий, диний ёки минтақалараро адоватни қўзғатишга (нифоқ) қаратилган ҳаракатлар, шунингдек, оммавий тартибсизликлар уюштириш ва унда иштирок этиш учун қонун ҳужжатларида 15 йилгача озодликдан маҳрум қилишни назарда тутадиган жиноий жавобгарлик борлиги ҳақида огоҳлантирган. 

Маълумот учун, Қамчибек Асанбек Қирғизистон ва МДҲдаги энг нуфузли “ворзакон”лардан бири бўлган. Тахаллуси – “Коля Қирғиз”. У наркотик бизнеси, қурол-яроғ савдоси, товламачилик, қора кўчмас мулк, талончилик, автомашина ўғирлаш, бандитизм, “пул ювиш”, давлат мулкини ўғирлаш ва буюртма асосида қотиллик қилиш билан шуғулланган. У Қирғизистондаги миллионерлардан бири эди.

Қайд этиш жоиз, 2020 йилдан бери Қирғизистон Миллий хавфсизлик давлат қўмитаси криминал авторитетни бир неча бор ҳибсга олган. 2023 йилнинг августида Қамчибек Кўлбоевга нисбатан жиноят иши даъво муддати ўтгани сабабли тугатилган. Криминал авторитет Қамчибек Асанбек Қозоғистонда трансмиллий жиноий ташкилот тузишда гумон қилинган. У 2023 йилнинг октябрь ойида Бишкекда ўлдирилди.

Эслатиб ўтамиз, аввалроқ Қамчибек Кўлбоев (Қамчибек Асанбек)нинг уюшган жиноий гуруҳи аъзоси қўлга олинганди. Халқаро қидирувда бўлган, қирғизистонлик ушбу шахс Қозоғистоннинг Олмаота шаҳри чеккасида ушланган. У 2008 йилда жиноий гуруҳлар ўртасидаги ўзаро жанжал пайтида содир этилган қотилликда гумон қилинмоқда.

Моҳичеҳра Қадамова