Криминал авторитет “Коля Қирғиз” жиноий гуруҳи аъзоси ушланди

Қирғизистонлик марҳум криминал авторитет Қамчибек Кўлбоев (Қамчибек Асанбек)нинг уюшган жиноий гуруҳи аъзоси қўлга олинди. Бу ҳақда Қозоғистон Ички ишлар вазирлиги хабар берди.

Халқаро қидирувда бўлган, қирғизистонлик ушбу шахс Қозоғистоннинг Олмаота шаҳри чеккасида ушланган. У 2008 йилда жиноий гуруҳлар ўртасидаги ўзаро жанжал пайтида содир этилган қотилликда гумон қилинмоқда.

Умуман, сентябрь ойининг бошидан буён қидирувда бўлган 81 нафар шахс қўлга олинди, 58 нафар бедарак йўқолган шахснинг манзиллари аниқланди. Остонада бир қатор фирибгарликларни содир этгани учун қидирувда бўлган шахс ушланди, етказилган зарар миқдори 160 миллион тенгедан ошади. Бундан ташқари, МДҲ давлатлари ва бошқа ҳудудларда 28 нафар жиноятчи қўлга олинган. Пойтахт аэропортида Молдова Республикаси Ички ишлар вазирлиги томонидан 2013 йилдан бери қидирувда бўлган Россия фуқароси кўрсатилган давлат фуқаросини ўғирлаб, ундан  150 минг АҚШ долларини ундираётган пайтда қўлга олинди.

Маълумот учун, Қамчибек Асанбек Қирғизистон ва МДҲдаги энг нуфузли “ворзакон”лардан бири бўлган. Тахаллуси – “Коля Қирғиз”. У наркотик бизнеси, қурол-яроғ савдоси, товламачилик, қора кўчмас мулк, талончилик, автомашина ўғирлаш, бандитизм, "пул ювиш", давлат мулкини ўғирлаш ва буюртма асосида қотиллик қилиш билан шуғулланган. У Қирғизистондаги миллионерлардан бири эди.

Қайд этиш жоиз, 2020 йилдан бери Қирғизистон Миллий хавфсизлик давлат қўмитаси криминал авторитетни бир неча бор ҳибсга олган. 2023 йилнинг августида Қамчибек Кўлбоевга нисбатан жиноят иши даъво муддати ўтгани сабабли тугатилган. Криминал авторитет Қамчибек Асанбек Қозоғистонда трансмиллий жиноий ташкилот тузишда гумон қилинган. У 2023 йилнинг октябрь ойида Бишкекда ўлдирилди.

Эслатиб ўтамиз, аввалроқ қирғизистонлик марҳум криминал авторитет Қамчибек Кўлбоев (Қамчибек Асанбек)нинг тансоқчиси Улан Барчакеев Москва шаҳрида қўлга олинганди. 53 ёшли Барчакеев жиноят оламида “Узун Улан” лақаби билан танилган. “Узун Улан” 2019 йилда Бишкекда содир этилган талончилик ҳужумида айбланмоқда. Кейин у чет эллик тадбиркордан жуда катта мулкни тортиб олган. Барчакеев айни пайтда Москвадан Бишкекга олиб келинган.