Криминал авторитет “Детина” Литвада қўлга олинди

Қирғизистондаги Рисбек Акматбоевнинг уюшган жиноий гуруҳи аъзоси бўлган, қотилликда айбланиб, халқаро қидирувга берилган криминал авторитет “Детина” Литвада қўлга олинди. Бу ҳақда Қирғизистон Ички ишлар вазирлиги хабар берди.

Маълум қилинишича, жорий йилнинг август ойида Литва ҳудудида ИИВ сўрови асосида 1979 йилда туғилган, криминал оламда “Детина” номи билан танилган Ю.Ю. қўлга олинган. Унинг ёнида Ш.А. номига расмийлаштирилган сохта ҳужжатлар бўлган.

Ю.Ю. Қирғизистон ҳуқуқ-тартибот органлари томонидан 2007 йилда Бишкекда содир этилган қотилликда айбланиб қидирувга берилган. Ўшанда у автомобиль ювиш шаҳобчаси эгасини отиб ўлдирган ва яширинган.

Бундан ташқари, у Қозоғистон ҳуқуқ-тартибот органлари томонидан Олмаотада содир этилган қотилликда гумонланган. У Интерпол орқали ҳам халқаро қидирувга берилган.

Қирғизистон ИИВ маълумотларига кўра, Ю.Ю. уюшган жиноий гуруҳ аъзоси сифатида оператив рўйхатда туради. Ҳозирда уни жиноий жавобгарликка тортиш учун Қирғизистоннинг ваколатли органлари экстрадиция жараёнини бошлаб юборган.

Рисбек Акматбоев ким эди?

1990 йилларда у Қирғизистоннинг энг қудратли “мафия раҳбари” ҳисобланган. Чолпон-Ота шаҳрида туғилган Акматбоев йирик уюшган жиноий гуруҳини тузиб, унга раҳбарлик қилган. Унинг номи бутун мамлакат бўйлаб қўрқув уйғотган. Оғир жиноятларда бир неча бор айбланганига қарамай, у сиёсий таъсир ўтказишга муваффақ бўлган ва ҳатто 2006 йилда парламент сайловида ғолиб чиққан. Аммо ўша йилнинг ўзида – 2006 йилнинг 10 май куни Бишкек яқинидаги Кўк-Жар қишлоғида масжиддан чиқаётган пайтда отиб ўлдирилган.

Эслатиб ўтамиз, аввалроқ Қирғизистонда криминал авторитет Қамчибек Кўлбоев (Қамчибек Асанбек) жиноий гуруҳини молиялаш билан шуғулланган “Барон” наркокартел раҳбари ва унинг 3 нафар аъзоси қўлга олинганди.