Кремль Киевни музокаралар учун қонуний тўсиқларни олиб ташлашга чақирди

Агар Украина фуқаролик инфратузилмасига ҳужумларни тўхтатиш бўйича Россия билан тўғридан тўғри музокаралар олиб боришни истаса, бунинг учун қонуний тўсиқларни олиб ташлаши керак. Бу ҳақда бугун, 22 апрель куни Россия Президенти матбуот котиби Дмитрий Песков баёнот берди.

“Агар Украина томони хоҳласа, Украина томони очиқ бўлса, бундай алоқалар йўлидаги бу тўсиқларни қонуний равишда “олиб ташлаш” учун қандайдир қадамлар қўйилиши керак”, деди Песков журналистларга, агар Украинада Россиянинг амалдаги раҳбарияти билан тўғридан тўғри алоқалар қонун билан тақиқланган бўлса, қандай қилиб музокаралар ўтказиш мумкинлиги ҳақидаги саволга жавоб берар экан.

Шу билан бирга, Россия Президенти матбуот котиби Кремль “турли каналлар орқали” Вашингтон билан Украинада тинчлик ўрнатиш бўйича музокараларни давом эттираётганини маълум қилди. Песковнинг сўзларига кўра, Россия-Украина можаросини ҳал қилиш масаласи “шунчалик мураккаб”ки, “қисқа муддат” белгилашдан маъно йўқ.

Шунингдек, бугун, 22 апрель куни Кремль шу ҳафтада АҚШ Президентининг махсус вакили Стивен Уиткоффнинг Москвага ташрифини кутаётганини маълум қилди.

Маълумот учун, 2022 йил октябрь ойида Украина Президенти Владимир Зеленский Украина Миллий хавфсизлик ва мудофаа кенгашининг Россия Федерациясининг амалдаги раҳбарияти билан музокараларни рад этиш ҳақидаги қарорини фармон билан тасдиқлаган эди. Кейинчалик Зеленский ушбу фармонни мамлакатдаги “сепаратчиликни тўхтатиш” истаги билан изоҳлади:

“Мен Украина Президентиман, у ёки бу музокараларнинг раҳбариман, қолган ҳаммага [музокараларни] ман қилганман”, деганди у ўшанда.

Эслатиб ўтамиз, 20 апрель куни Украина етакчиси Владимир Зеленский Россияга фуқаролик инфратузилмасига ҳужумларни 30 кунга “узайтириш имконияти билан” тўхтатишни таклиф қилган эди. Бунга жавобан Россия Президенти Владимир Путин ушбу ташаббусни тўғридан тўғри музокаралар форматига имкон берадиган “саралаш” кераклигини айтди. Песковнинг айтишича, Киевдан Путиннинг баёнотига кейинроқ ҳеч қандай муносабат билдирилмаган.