Кон қулаши оқибатида 200 дан ортиқ киши ҳалок бўлди

Колтан конида юз берган қулаш оқибатида 200 дан ортиқ киши ҳалок бўлди. Фожиа ер қатламининг юмшоқлиги ва намлиги сабаб содир бўлгани айтилмоқда. Бу ҳақда кеча, 30 январь куни “Reuters” хабар берди.

Маълум қилинишича, бахтсиз ҳодиса Конго Демократик Республикасининг шарқидаги Рубая Cолтан конида содир бўлган. Рубая кони дунё бўйича қазиб олинадиган колтаннинг қарийб 15 фоизини етказиб беради. Колтан танталга қайта ишланиб, иссиққа чидамли металлга айланади. Ушбу материал мобил телефонлар, компьютерлар, аэрокосмик саноат компонентлари, газ турбиналари ҳамда тиббий имплантлар ишлаб чиқаришда кенг қўлланилади.

Ҳудудда яшовчи маҳаллий аҳоли конлардан рудани кунига бир неча доллар эвазига қўлда қазиб олган. Коннинг қулашига олиб келган авария 28 январь куни содир бўлган бўлиб, қурбонлар сони 30 январь куни кечқурун расман маълум қилинган. Бироқ, расмийлар ҳалок бўлганлар сони бундан ҳам кўпроқ бўлиши мумкинлигини айтишмоқда.

Маҳаллий ҳокимият вакилининг сўзларига кўра, кўчки қурбонлари орасида кончилар билан бирга болалар ва аёллар ҳам бўлган. Улар ёлланма ишчи бўлиб ишлаган. 

“Биз ҳозир ёмғирли мавсумдамиз. Ер жуда мўрт. Жабрланганлар чуқурда бўлган пайтда тупроқ қулаб тушган”, дейди гувоҳлардан бири.

Расмий маълумотларга кўра, ҳозирга қадар 227 нафар шахснинг вафоти тасдиқланган.

Эслатиб ўтамиз, аввалроқ Таиландда пиротехника фабрикасида портлаш юз бергани ҳақида хабар берилганди. Ҳодиса оқибатида тўрт киши – бир аёл ва уч нафар эркак жароҳат олган. Улардан бир эркакни қутқариб қолишнинг имкони бўлмаган. Қолган жабрланганлар яқин атрофдаги шифохоналарга етказилган.