Клопп Германия терма жамоасини бошқаришга рози бўлди

Германия футбол ассоциацияси (DFB) раҳбарияти Юрген Клоппни миллий терма жамоа бош мураббийи этиб тайинлаш бўйича музокара ўтказади. Бу ҳақда DFB матбуот хизмати хабар берди.

DFB баёнотида Клопп ушбу лавозимни эгаллашга тайёр эканини билдиргани қайд этилган. Аввалроқ, Германия терма жамоасини бу йилги Жаҳон чемпионати 1/16 финалига олиб чиққан Юлиан Нагельсманн бош мураббийлик лавозимидан истеъфога чиққанди. Германия мазкур босқичда Парагвайга пенальтилар сериясида мағлуб бўлган.

59 ёшли Клопп сўнгги бор “Ливерпуль”да ишлаган. Германиялик мутахассис 2015 йилдан 2024 йилгача мерсисайдликларни бошқариб, жамоани 2019 йилда UEFA Чемпионлар лигаси ғолиблигига, 2020 йилда эса 30 йиллик танаффусдан кейин Англия чемпионлигига олиб келган.

Клопп даврида “Ливерпуль” 2022 йилда Англия кубоги ва Суперкубогини, 2019 йилда Лига кубоги, UEFA Суперкубоги ҳамда FIFA клублар ўртасидаги Жаҳон чемпионатини, 2024 йилда эса яна Англия Лига кубогини қўлга киритган. У 2019 ва 2020 йилларда FIFA талқинига кўра “Йилнинг энг яхши мураббийи” деб топилган. “Ливерпуль”дан кетганидан сўнг немис мутахассиси Red Bull футбол операциялари бўлими раҳбари лавозимига тайинланган.