Киев АҚШдан кечирим сўрашдан бош тортди

Украина расмийлари Оқ уйда Украина Президенти Владимир Зеленский ва Америка раҳбарияти ўртасидаги келишмовчилик учун АҚШдан кечирим сўрамайди. Бу ҳақда Украина Президенти девони раҳбари маслаҳатчиси Михайло Подоляк Франциянинг “Le Point” нашрига берган интервьюсида маълум қилди.

“Зеленский ҳам шаклан, ҳам мазмун жиҳатдан мутлақо ҳақ эди, у америкалик шерикларимизга асосий ғояни етказмоқчи бўлди: Россияга босим ўтказмасдан, ҳеч нарса қилинмайди”, деди у.

Подолякнинг қўшимча қилишича, Киев “аслида қилинмаган хато учун” кечирим сўрамайди.

У, шунингдек, Зеленский Оқ уйда камситилганига ишонмаслигини билдирди ва суҳбатнинг ўзини “сиёсий етакчилар ўртасидаги жуда эмоцианал мунозара” деб атади.

“Ажабланарлиси шундаки, учрашув қайсидир маънода фойдали бўлди. Фарқларимизни таъкидлаб, биз ўз қарашларимизни аниқлаштиришимиз мумкин”, дейди Подоляк.

Овал офисдаги жанжал

АҚШ ва Украина ўртасида Украина фойдали қазилмаларига кириш тўғрисидаги битим 28 февраль куни Оқ уйнинг Овал кабинетида имзоланиши режалаштирилган эди, бироқ имзоланиш олдидан бўлиб ўтган протокол тадбири чоғида Зеленский ва Трамп оғзаки жанжаллашиб қолган, бунда АҚШ вице-президенти Жеймс Дэвид Вэнс ҳам иштирок этган. Оқибатда Зеленский Оқ уйни муддатидан олдин тарк этишга мажбур бўлди ва келишув имзоланмади.

Зеленский жанжалдан сўнг дарҳол “Fox News” телеканалига берган интервьюсида бошловчининг бўлган воқеа учун узр сўраш зарурлигини ҳис қилдими ёки йўқми деган саволига жавоб берар экан, Қўшма Штатлардан миннатдор эканини, бироқ “мен ёмон иш қилганим йўқ, деб ўйламайман” ва “баъзи нарсаларни камерадан ташқари муҳокама қилиш кераклигини” қўшимча қилди.

Кейинроқ АҚШ Давлат котиби Марко Рубио ҳам Зеленскийдан кечирим сўрашни талаб қилди