Ким Чен Ин янги ракета двигателини синовдан ўтказди

Шимолий Корея углерод толалари билан мустаҳкамланган композит материалдан фойдаланган ҳолда қаттиқ ёнилғи билан ишлайдиган ракета двигателини синовдан ўтказди. Бу ҳақда Корея марказий ахборот агентлиги хабар берди.

Шимолий Корея етакчиси Ким Чен Ин синовни кузатди. Қайд этилишича, бу ишланма мудофаа соҳасини модернизация қилиш учун стратегик аҳамиятга эга бўлиб, “КХДР стратегик ядровий қуролли кучларини кенгайтириш ва мустаҳкамлашда катта ўзгаришлар бўлишини кутилмоқда”. Бу двигателнинг тўққизинчи синови бўлиб, у ишлаб чиқиш жараёнида охирги бўлиши керак.

КХДРда қитъалараро баллистик ракеталар ишлаб чиқаришда қўлланиладиган юқори қувватли қаттиқ ёнилғи двигателининг яратилиши сентябрь ойи бошида маълум бўлган эди. Двигателнинг максимал қуввати 1960 кН, уни “Хвасонпхо-19” ва кейинги авлод “Хвасонпхо-20” қитъалараро баллистик ракеталари учун ишлатиш режалаштирилган.

Ким Чен Ин двигатель синовлари натижалари билан танишгач, мутахассислар билан бундай маҳсулотларни серияли ишлаб чиқариш базасини яратиш масаласини муҳокама қилди.

Маълумот учун, жорий йил август ойи охирида Ким Чен Ин ракета ишлаб чиқариш қувватини яратиш бўйича учта янги режа ва тегишли мудофаа харажатлари лойиҳасини имзолаган.