Ким Чен Ин янги кўприк орқали Хитойга борди (видео)

Бугун, 24 октябрь куни КХДР етакчиси Ким Чен Ин Хитойга ташриф буюрди. У чегарадаги Даньдун шаҳрига яқинда очилган Ялуцзян дарёси орқали ўтувчи Янги кўприк орқали мамлакатга кирган. Бу ҳақда анонимлик шарти билан Жанубий Корея расмийси “Reuters”га маълум қилди.

Жанубий Корея ҳукуматидаги манбанинг сўзларига кўра, Даньдунда Кимни ХХР Давлат кенгаши Бош вазири Ли Цян кутиб олган. “Yonhap”нинг ёзишича, Ким бугуннинг ўзидаёқ ватанига қайтиши керак. “Reuters” суҳбатдошининг фикрича, Шимолий Корея етакчиси жорий йилнинг 26 октябрь куни бошланадиган Хитой Коммунистик партияси олий раҳбариятининг йиғилишлари олдидан Пекинга ташриф буюриши эҳтимолдан йироқ.

Икки мамлакат ўртасидаги асосий қуруқлик ўтиш жойига айланган 3 километрлик кўприк кўп йиллик кечикишлардан сўнг октябрь ойида фойдаланишга топширилди. Пекин ва Пхеньян кескин муносабатлар даври ҳамда пандемия чекловларидан сўнг савдо-сотиқни жонлантиришга умид қилмоқда. Кўприк орқали КХДР учун оғир техника, хомашё ва энергия ресурсларини ташиш режалаштирилган. 

Маълумот учун, Хитой – Пхеньяннинг асосий иқтисодий ва дипломатик ҳамкори бўлиб, КХДР расмий савдосининг катта қисми унинг ҳиссасига тўғри келади. Бироқ Россиянинг 2022 йилда Украинага кенг кўламли бостириб кириши бошланганидан сўнг, Шимолий Корея Москва билан яқинлашди ва таҳлилчиларнинг баҳолашига кўра, унинг Пекинга қарамлиги заифлашган. Кимнинг Хитойга аввалги маълум ташрифи 2025 йилнинг сентябрь ойида бўлган ва у Ғалабанинг 80 йиллигига бағишланган тантаналарда қатнашган, шунингдек, Си Цзиньпин билан музокаралар ўтказган.

Эслатиб ўтамиз, аввалроқ Хитой яқин кунларда Шимолий Корея билан боғловчи, 2014 йилда қуриб битказилган, аммо шу кунгача фойдаланилмаган янги кўприкни очишни режалаштираётгани ҳақида хабар берилган эди.