Хорхе Жезуш “Ал-Наср”дан кетди

Саудия Арабистонининг “Ал-Наср” футбол клуби бош мураббийи, португалиялик мутахассис Хорхе Жезуш ўз лавозимини тарк этди. Бу ҳақда жамоа матбуот хизмати хабар берди.

“Қандай саргузашт. Қандай саҳифа. Ҳаммаси учун Раҳмат, устоз”, дейилади клуб хабарида.

Жорий йилнинг 21 май куни Саудия Про-лигасининг 34-турида “Ал-Наср” ўз майдонида “Дамак”ни 4:1 ҳисобида мағлуб этди ва 86 очко билан чемпионликни қўлга киритди. Бу Криштиану Роналду 2023 йилда жамоага келганидан бери клубнинг энг яхши натижаси бўлди. Аввалги икки мавсумда “Ал-Наср” чемпионатни иккинчи ўринда якунлаган эди.

Мазкур учрашувда Роналду дубль муаллифи бўлди. Шунингдек, Садио Мане ва Кингсли Коман ҳам ўз номини таблога ёздириб қўйди. Меҳмонларнинг ягона голини эса, Морлай Силла 57-дақиқада пенальтидан киритди.

Мавсумнинг сўнгги ўйинидан кейин Хорхе Жезуш Криштиану Роналдуга чемпионликни қўлга киритиш ҳақида берган ваъдасини бажарганини айтди ва жамоани тарк этаётганини маълум қилди.

Маълумот учун, Жезуш 2025 йил июль ойида “Ал-Наср” бош мураббийи этиб тайинланган эди. Ундан аввал у Саудия Арабистонининг яна бир гранди – “Ал-Ҳилол”ни бошқарган, аммо 2025 йилда клубдан кетган эди.