Хитойда мафия оиласининг яна 4 аъзоси қатл этилди

Хитойда Мьянмадаги фирибгарлик (скам) марказлари тармоғини бошқарган Бай мафия оиласи аъзоларининг тўрт нафарига нисбатан чиқарилган ўлим жазоси ижро этилди. Бу ҳақда “Синьхуа” хабар берди.

Улар 2025 йил ноябрида “қасддан одам ўлдириш, телекоммуникация соҳасидаги фирибгарлик ва ноқонуний гиёҳванд моддалар савдоси каби бир қатор жиноятлар” учун ўлим жазосига ҳукм қилинган.

“Қатл Хитой Халқ Республикаси Олий халқ суди санкцияси билан Гуандун вилоятининг (Жанубий Хитой) Шэньчжэнь шаҳри суди томонидан амалга оширилди”, дейилади хабарда.

BBC’нинг ёзишича, Бай, Мин ва яна бир неча жиноий кланлар йиллар давомида Мьянманинг чегарага яқин Лауккай шаҳрини назорат қилиб келган. Улар у ерда казино, порно-индустрия мавзелари ва киберфирибгарлик марказларини бошқарган. Ҳатто ўзининг ҳарбийлаштирилган бўлинмасига эга бўлган Бай оиласи 41 та ёпиқ мажмуа барпо этиб, уларда фирибгар колл-марказлар ва казиноларни жойлаштирган. Тергов маълумотларига кўра, Бай оиласи аъзолари тахминан 11 тонна метамфетамин ишлаб чиқариш ва сотишда ҳам иштирок этган.

Бай оиласининг жиноий фаолияти оқибатида Хитойнинг олти нафар фуқароси ҳалок бўлган, яна бир неча киши жароҳат олган. “Синьхуа”га кўра, қатл этилганлар орасида жиноий гуруҳи бошлиғи Бай Инцан ҳам бўлган. BBC эса Бай оиласининг етакчиси Бай Суочэн бўлганини, у бошқалар билан бирга суд қилинганини, бироқ ҳукм ижросигача етмай, касаллик туфайли вафот этганини ёзмоқда.

BBC’га кўра, жиноятчи оилалар 2000 йилларнинг бошидан буён Лауккайни назорат қилиб келган, бироқ 2023 йилда Пекин Мьянма ҳарбийларининг фирибгарлик синдикатларига қарши чора кўрмаётганидан норозилигини билдирган ва бу ҳудуддаги этник исёнчиларнинг ҳужумини норасмий тарзда қўллаб-қувватлаган. Натижада синдикатлар тор-мор этилиб, уларнинг аъзолари қўлга олинган ва Хитойда суд қилинган. Жиноий оилаларнинг асосий қурбонлари айнан Хитой фуқаролари бўлган.

Эслатиб ўтамиз, аввалроқ Мьянмада фирибгарлик скам-марказлари тармоғини бошқарган Мин мафия оиласининг 11 нафар аъзоси қатл этилгани ҳақида хабар берилган эди.