Катта “ов”: Италияда мафия гуруҳунинг 30 аъзоси қўлга олинди

Италия карабинерлари (ҳарбийлаштирилган полиция) мамлакат жанубидаги Апулия вилоятида мафия гуруҳуга қарши кенг кўламли операция ўтказди. Мафия фаолияти, гиёҳванд моддаларнинг ноқонуний айланиши ва бир қатор оғир жиноятлар бўйича қўзғатилган жиноят иши доирасида 30 киши ҳибсга олинди. Бу ҳақда ҳуқуқ-тартибот идораларининг баёнотида сўз боради.

“Лечче қўмондонлиги карабинерлари жами 52 нафар гумонланувчи фигурант бўлган жиноят иши доирасида 30 та эҳтиёт чорасини қўллади. Чора кўрилган 30 кишидан 27 нафари қамоққа олинди, уч нафари эса уй қамоғига жойлаштирилди”, дейилади хабарда.

Гап “Sacra Corona Unita” (“Бирлашган муқаддас тож”) мафия ташкилоти билан алоқадор бўлган гуруҳ ҳақида бормоқда. Тергов талқинига кўра, қўлга олинганлар мафия ҳамжамиятида иштирок этиш, қотилликка суиқасд қилиш, наркотрафикни ташкил этиш, қурол-яроғ ва портловчи моддаларни сақлаш ҳамда олиб юриш, ўғирланган буюмларни сотиб олиш, ўт қўйиш, таҳдид қилиш ва мафия таркиби туфайли оғирлаштирувчи ҳолатлар мавжуд бўлган бошқа жиноятларга алоқадор.

Тергов давомида жиноий гуруҳнинг учта тахминий “саммити” (йиғилиши) аниқланган. Ушбу йиғилишларда янги аъзоларни қабул қилиш маросимлари ўтказилган, шунингдек, наркотрафик, ҳибсга олинган шерикларни моддий қўллаб-қувватлаш ва ички низоларни ҳал қилиш масалалари муҳокама қилинган.

“Аъзоликка қабул қилиш ритуали янги қабул қилинаётган шахснинг ўнг елкаси, кўкраги ёки қорнига хоч шаклини чизишни ва шундан сўнг маросим иштирокчиларининг лабларидан ўпишни ўз ичига олган. Бундай белгилар тергов ҳаракатлари давомида кейинчалик ҳибсга олинган баъзи гумонланувчиларда ҳам аниқланган”, дейилади хабарда.

Эслатиб ўтамиз, аввалроқ Хитойда Мьянмадаги фирибгарлик (скам) марказлари тармоғини бошқарган Бай мафия оиласи аъзоларининг тўрт нафарига нисбатан чиқарилган ўлим жазоси ижро этилганди.