Трамп собиқ ҳарбийнинг қатлини жонли эфирда намойиш этишдан воз кечди

АҚШ Президенти Дональд Трамп 2009 йилда Техасдаги Форт-Ҳуд ҳарбий базасида 13 нафар ҳарбийни отиб ўлдирган собиқ армия психиатри Нидал Ҳасаннинг қатл этилишини жонли эфирда кўрсатиш режасини бекор қилди. Бироқ у белгиланган муддатда отишма орқали қатл этилади. Бу ҳақда BBC хабар берди.

Аввалроқ, Пентагон Ҳасан 2026 йил 3 декабрь куни отишма орқали қатл этилишини ва жараён интернетда жонли эфирда намойиш қилинишини маълум қилганди. Бу қарор АҚШда ва халқаро миқёсда танқидларга сабаб бўлди. БМТ режани “жирканч“ деб атади.

Трамп кеча, 15 октябрь куни Truth Social ижтимоий тармоғида кўплаб яхши ниятли инсонлар Ҳасаннинг ўлимини томоша қилишни истамаслигини ёзган. Унинг фикрича, қатлни жонли эфирда кўрсатиш террорчилар ва шунга ўхшаш жиноятчилар учун огоҳлантириш бўлиши мумкин эди.

“У белгиланганидек, отишма орқали қатл этилади, аммо бу жараён жонли эфирда кўрсатилмайди“, деб ёзган Трамп.

Президент қурбонларнинг оила аъзолари қатл жараёнини шахсан бориб кўришлари мумкинлигини ҳам айтган.

“Улар адолат қарор топганига гувоҳ бўлиши керак“, деган у.

Трамп жонли эфирни бекор қилганини эълон қилгач, Пентагон вакили Шон Парнелл мудофаа вазири президентнинг қарорини қўллаб-қувватлашини маълум қилган.

Ҳасаннинг адвокати Жон Галлиган эса қатл жараёнини жонли эфирда кўрсатиш режаси бошиданоқ нотўғри бўлганини айтган. Унинг таъкидлашича, бу режа армиянинг ўз қоидаларига ҳам зид эди. Адвокат Ҳасаннинг кўкрагидан пастки қисми фалаж эканини, Трамп эса жонли эфирни маъқуллаган пайтда бундан хабардор бўлмаган бўлиши мумкинлигини билдирган.

“Зарар аллақачон етказилди. Армия энди вазиятни тўғрилашга уринмоқда. Бу ҳолат ҳарбий адлия тизимимизда доимий доғ бўлиб қолади“, деган Галлиган.

Маълумот учун, 2009 йил 5 ноябрь куни Нидал Ҳасан Форт-Ҳуд ҳарбий базасидаги тиббиёт биносида аскарлар тиббий кўрик ва эмлашни кутаётган пайтда ўт очган. Оқибатда 13 нафар қуролсиз ҳарбий ҳалок бўлган, яна 32 киши яраланган. Ҳасан 2013 йилда ҳарбий судда отишмани ўзи содир этганини тан олган ва қилган ишлари учун узр сўраган.

АҚШ қонунчилигига кўра, ҳарбий хизматчини қатл этиш учун президентнинг розилиги талаб қилинади. Ҳукм ижро этилишидан олдин эса юқори инстанция суди унинг қонунийлигини қайта кўриб чиқиши керак.

Эслатиб ўтамиз, аввалроқ АҚШ Президенти Дональд Трамп Нидал Ҳасанни отишма гуруҳи орқали қатл этишни маъқуллагани ҳақида хабар берилган эди.