Хитой Фаластинга ёрдам беришда давом этишини маълум қилди

Хитой Фаластинга гуманитар ёрдам кўрсатишда давом этади. Бу ҳақда Хитой ҳукуматининг Яқин Шарқ бўйича махсус вакили Чжай Цзюнь маълум қилди.

"Хитой Фаластинга БМТ ва икки томонлама каналлар орқали Ғазо аҳолиси дуч келаётган инқирозни юмшатиш учун фавқулодда гуманитар ёрдам кўрсатган ва кўрсатишда давом этади. Хитой Мисрнинг Ғазо секторидаги аҳволни яхшилашга қаратилган саъй-ҳаракатларини юқори баҳолайди”, дея унинг сўзларидан иқтибос келтирган Хитой марказий телевидениеси.

Махсус вакилнинг таъкидлашича, ҳозирда Фаластин-Исроил можароси кескинлигича қолмоқда. 

“Ғазодаги вазият жуда жиддий ва тинч аҳолининг ҳаётига нисбатан хавф ҳеч қачон бунчалик катта бўлмаган”, дейди у.

Чжай Цзюннинг сўзларига кўра, Исроилнинг Ливан ва Сурия билан чегарасидаги тўқнашувлар ҳам хавотирга сабаб бўлмоқда. 

“Халқаро ҳамжамият бу борада ҳушёрликни кучайтириши, зудлик билан чора кўриши, барча тегишли томонларни халқаро гуманитар қонунларга қатъий риоя қилишга чақириши, жиддий гуманитар офатларнинг олдини олиш учун барча имкониятларни ишга солиши, вазиятни назорат қилиш ва унинг кучайишига йўл қўймаслик учун биргаликда ҳаракат қилиши керак”, дейди дипломат.

Эслатиб ўтамиз, 20 октябрь куни ғазоликлар учун асосий озиқ-овқат, сув ва дори-дармонлардан иборат гуманитар ёрдам манзилга мувафаққиятли етиб боргани хабар берилган эди. Бу уруш бошланганидан бери Ғазо сектори учун ажратилган биринчи гуманитар ёрдам ҳисобланади.